Samarqand viloyatida aholining tez tibbiy yordamga murojaatlari sezilarli darajada kamaydi. Xususan, 2020-yilning 20—25-iyul kunlari viloyatda tez tibbiy yordamga 3500 dan ortiq murojaat qabul qilingan bo‘lsa, shu kunlarda bu ko‘rsatkich 2400—2500 tani tashkil qilmoqda. Bu haqda Samarqand hokimi Erkinjon Turdimov ishtirokidagi brifingda ma’lum qilindi, deya xabar berdi “Daryo” muxbiri.
Ta’kidlanishicha, o‘tgan fursatda viloyatda tez yordam brigadalarining moddiy-texnik holati yaxshilanib, tez yordam mashinalarining soni 280 tadan 363 taga yetkazilgan. Bundan tashqari, tizim uchun Jizzaxdagi “Volkswagen” qo‘shma korxonasida ishlab chiqarilayotgan 10 ta maxsus tez yordam mashinasi xarid qilinmoqda. Hozirda viloyatning tez yordam mashinalariga bo‘lgan ehtiyoji 130 foizga bajarilgan.
“Avvalgi brifingda Samarqand shahridagi Olimpiya zahiralari tayyorlash markazida 1080 o‘rinli shifoxona qurilishi haqida gapirgan edik. Bugun mana shu muassasa foydalanish uchun tayyor bo‘ldi. Shifoxonada koronavirus infeksiyasi bilan kasallangan va pnevmoniyaga chalingan bemorlarni davolash uchun barcha shart-sharoit yaratildi. Eng zarur dori va tibbiy asbob-uskunalar – IVL, kardiomonitor, Bobrov apparati, nebulayzer bilan jihozlandi”, — dedi Erkinjon Turdimov.
Viloyat hokimining ta’kidlashicha, 1080 o‘rinning barchasiga konsol o‘rnatilib, bemorlarning kislorod bilan davolanishi ta’minlangan. Shifoxonada jami 34 nafar vrach, 90 nafar hamshira va 90 nafar kichik tibbiyot xodimi xizmat ko‘rsatadi. Bu yerga olib kelingan bemor shu yerning o‘zida rentgentga tushirilib, kardiolog, terapevt va boshqa tor mutaxassis shifokorlar ko‘rigidan o‘tkaziladi.
“Yangi tashkil qilingan laboratoriyada koronavirus uchun test hamda bemorning holatiga qarab boshqa tahlillar shu yerning o‘zida olinadi. Bemorlarga kislorod uzluksizligini ta’minlash maqsadida shifoxonaga zamonaviy kislorod stantsiyasi qo‘yiladi”, — deydi viloyat hokimi.
Erkinjon Turdimovning ma’lum qilishicha, bugungi kunda viloyatda uch oyga yetadigan dori-darmon vositalari zaxirasi yaratilgan. Bundan tashqari, uyda davolanish uchun qoldirilgan bemorlarga 5000 dona dori jamlanmasi tayyorlangan. Tegishli poliklinika vrachlarining tavsiyasi bilan ushbu dori-darmon jamlanmalari bemorlarga beriladi.
Izoh (0)