Qashqadaryo viloyatida koronavirusga chalingan bemorlar endilikda uy sharoitida emas, statsionar sharoitda davolanadi. Bu haqda viloyat hokimi Zoir Mirzayev ma’lum qildi.
“Bundan keyin kasallik aniqlangan fuqarolar uyda emas, to‘liq statsionar sharoitda davolanadi — dedi viloyat hokimi Zoir Mirzayev. — O‘rganishlar shuni ko‘rsatayaptiki, uyda davolanishdan ko‘ra statsionar sharoitda davolanish ancha ishonchli va samarali. Qolaversa, viloyatda yaratilgan zaxira o‘rinlaridan tashqari shifoxonalarda koronavirusni davolash uchun ajratilgan o‘rinlar soni ham, dori-darmon zaxirasi ham yetarli”.
Ta’kidlanishicha, viloyatda endilikda har bir tibbiyot muassasasida eng kamida bittadan mobil guruh tashkil qilinadi va mazkur mobil guruhlar uy sharoitida davolanayotgan bemorlar, kasallikka shubha qilinganlar holidan xabardor bo‘lib turadi.
Mahalla raisi va profilaktika inspektori esa ayni kungacha koronavirusga chalinib, uyida davolanayotganlar ro‘yxatini shakllantiradi. Hamda bemor davolanayotgan hududda karantin va izolyatsiya qoidalariga qay darajada amal qilinayotganini nazorat qiladi.
Zoir Mirzayev viloyatda karantin choralari yumshatilishi ortidan sektor rahbarlari va mutasaddilarga bu haqda zarur topshiriqlar bergan. Sektor rahbarlari bularning barchasini chuqur o‘rganib, tahlil qilib borishi va shunga ko‘ra ish tutishi shartligini qo‘shimcha qilgan.
Izoh (0)