Самарқанд вилоятида аҳолининг тез тиббий ёрдамга мурожаатлари сезиларли даражада камайди. Хусусан, 2020 йилнинг 20—25 июль кунлари вилоятда тез тиббий ёрдамга 3500 дан ортиқ мурожаат қабул қилинган бўлса, шу кунларда бу кўрсаткич 2400—2500 тани ташкил қилмоқда. Бу ҳақда Самарқанд ҳокими Эркинжон Турдимов иштирокидаги брифингда маълум қилинди, дея хабар берди «Дарё» мухбири.
Таъкидланишича, ўтган фурсатда вилоятда тез ёрдам бригадаларининг моддий-техник ҳолати яхшиланиб, тез ёрдам машиналарининг сони 280 тадан 363 тага етказилган. Бундан ташқари, тизим учун Жиззахдаги «Volkswagen» қўшма корхонасида ишлаб чиқарилаётган 10 та махсус тез ёрдам машинаси харид қилинмоқда. Ҳозирда вилоятнинг тез ёрдам машиналарига бўлган эҳтиёжи 130 фоизга бажарилган.
«Аввалги брифингда Самарқанд шаҳридаги Олимпия заҳиралари тайёрлаш марказида 1080 ўринли шифохона қурилиши ҳақида гапирган эдик. Бугун мана шу муассаса фойдаланиш учун тайёр бўлди. Шифохонада коронавирус инфекцияси билан касалланган ва пневмонияга чалинган беморларни даволаш учун барча шарт-шароит яратилди. Энг зарур дори ва тиббий асбоб-ускуналар – ИВЛ, кардиомонитор, Бобров аппарати, небулайзер билан жиҳозланди», — деди Эркинжон Турдимов.
Вилоят ҳокимининг таъкидлашича, 1080 ўриннинг барчасига консол ўрнатилиб, беморларнинг кислород билан даволаниши таъминланган. Шифохонада жами 34 нафар врач, 90 нафар ҳамшира ва 90 нафар кичик тиббиёт ходими хизмат кўрсатади. Бу ерга олиб келинган бемор шу ернинг ўзида рентгентга туширилиб, кардиолог, терапевт ва бошқа тор мутахассис шифокорлар кўригидан ўтказилади.
«Янги ташкил қилинган лабораторияда коронавирус учун тест ҳамда беморнинг ҳолатига қараб бошқа таҳлиллар шу ернинг ўзида олинади. Беморларга кислород узлуксизлигини таъминлаш мақсадида шифохонага замонавий кислород станцияси қўйилади», — дейди вилоят ҳокими.
Эркинжон Турдимовнинг маълум қилишича, бугунги кунда вилоятда уч ойга етадиган дори-дармон воситалари захираси яратилган. Бундан ташқари, уйда даволаниш учун қолдирилган беморларга 5000 дона дори жамланмаси тайёрланган. Тегишли поликлиника врачларининг тавсияси билан ушбу дори-дармон жамланмалари беморларга берилади.
Изоҳ (0)