O‘zbekistonda 1-sentabrdan yoshga doir pensiyalar va nafaqalar miqdorining oshirilishi inflyatsiya ko‘rsatkichlariga bog‘liq emas. Bu haqda moliya vaziri o‘rinbosari Jamshid Abruyevga tayanib, “Gazeta.uz” xabar berdi.
Avvalroq Prezidenti farmoni bilan 2020-yil 1-sentabrdan boshlab yoshga doir pensiyalar, bolalikdan nogironligi bo‘lgan shaxslarga, zarur ish stajiga ega bo‘lmagan keksa yoshdagi va mehnatga layoqatsiz fuqarolarga beriladigan nafaqalar miqdori 10 foizga oshirilishi to‘g‘risida xabar berilgandi.
Bundan tashqari, 14 yoshgacha bolalari bor oilalar uchun nafaqa oluvchilar sonini ikki baravarga (345 mingdan 700 minggacha), 2 yoshgacha bo‘lgan bolaga qarovchilar uchun nafaqa oluvchilarni 20 foizga (333 mingdan 400 minggacha) hamda moddiy yordam oluvchilar (89 mingdan 100 minggacha) sonini 13 foizga oshirish ko‘zda tutilgan.
Mazkur qaror 3,7 million aholiga taalluqli. Shu bilan birga, Moliya vazirligi huzuridagi budjetdan tashqari Pensiya jamg‘armasi xarajatlari 1 trillion so‘mga oshadi.
Jamshid Abruyevning ta’kidlashicha, pensiya va nafaqalar miqdorining oshirilishi, yanvar—iyul oyida 4,3 foizni tashkil etgan inflyatsiya ko‘rsatkichlariga bog‘liq emas.
“O‘tgan yetti oy davomidagi inflyatsiya ko‘rsatkichlari past, dastlabki ma’lumotlarga ko‘ra, 4,3 foizni tashkil etmoqda. Pensiya va nafaqa miqdorining 10 foizga oshirilishi, pandemiya vaqtida oziq-ovqat, dori-darmon yoki boshqa xizmatlarga bo‘lgan ehtiyojini qo‘llab-quvvatlashga qaratilgan. Bularning barchasi mavjud imkoniyatlarga asoslangan — 2020-yilda ushbu tadbir uchun budjet xarajatlari qo‘shimcha ravishda 1 trillion 40 milliard so‘mni tashkil etadi”, — deydi moliya vaziri o‘rinbosari.
Jamshid Abruyevning ta’kidlashicha, bazaviy hisoblash miqdori 2019-yil 1-avgustda belgilandan qiymat bo‘yicha o‘zgarishsiz qoladi — 223 ming so‘m.
Izoh (0)