Qashqadaryo viloyat ma’muriy sudi “Sevimli” telekanalining Samarqand viloyatidagi muxbiri Mo‘tabar Nurmuhammedovaga xususiy ajrim e’lon qilganini aytdi, biroq ko‘p o‘tmay aytgan gapidan ham qaytdi. Bu haqda “Daryo” muxbiri Otabek Qo‘ldoshev xabar berdi.
Viloyat ma’muriy sudi sudyalari bilan muloqot qilgan “Daryo” muxbirining yozishicha, ishni ko‘rgan sud televideniye muxbirining ko‘zini qo‘rqitish uchunmi yoki boshqa maqsad ilinjidami sudda muxbirga xususiy ajrim chiqarganini ma’lum qilgan. Ammo aytilgan gap sud zalidan chiqqach, natijasiz qolgan. Qisqasini aytganda, sudda aytilgan ajrimdan haligacha darak yo‘q. Muxbirga xususiy ajrim chiqarilgani haqidagi qaror shunchaki aytilgan bo‘lib chiqmoqda.
Qiziq, Qashqadaryo viloyat ma’muriy sudining aytib, aytgan gapidan qaytadigan odati ham bormi?
Ma’lum bo‘lishicha, Qarshi shahar hokimligi va shahar televideniyesi o‘rtasidagi yer mojarosini viloyat ma’muriy sudi ko‘rib chiqayotgan bo‘lgan. Mazkur jarayonni yoritishga kelgan televideniye muxbiri Mo‘tabar Nurmuhammedova sud zaliga kirishga uringanida uning qo‘l telefoni va sumkasi olib qo‘yilgan.
“Sud binosiga kirishda Milliy gvardiya xodimlari telefonimni qoldirishni so‘radi. So‘ngra sumkamni ko‘zdan kechirishdi. Sumkani ko‘rib bo‘lgach, sumkani ham tashlab ketasiz, deyishdi. Xodimga odatda sud binosiga ish qurol bilan kirishimizni, qo‘l telefon va sumka ichidagi yozuv daftari ishda judayam zarurligini ta’kidladim. Biroq tushunishni istamadi. Sud ruxsat bermayapti, degan gapni aytdi. Sumkamni olib qolayotgan Milliy gvardiya xodimiga agarda kimdir sumkasini qoldirib, qaytib chiqqanda ‘sumkamda ming dollar pul bor edi, qani’ desa nima qilasiz? Harqalay, ayollar sumkasini olib qoling deyishmagandir, dedim. Bor gap shu”, — deydi Mo‘tabar Nurmuhammedova.
Mo‘tabar Nurmuhammedova sud tizimi bilan doimiy hamkorlikda ishlashini aytib, “Sudlar o‘ziga zarur paytda — qanaqadir islohotni ko‘rsatishdami yoki kimnidir qamayotgandami televideniyeni chaqirib yoritishni so‘rashadi. Qamalayotgan odam mening shaxsiy hayotim bor, dod, ko‘rsatma, uyatdan o‘laman, desa ham parvo qilishmaydi, jarayonni tasvirga olishimizga ruxsat beradi. Unaqa paytda inson sha’nini to‘rtinchi darajaga qo‘yib qo‘yishadi. Mabodo siz suddan jabrlanayotganlarni ko‘rsatishga urinsangiz, tomonlarni ro‘kach qilib sudda qatnashishingizga qarshilik ko‘rsatishadi”, — dedi.
Ta’kidlanishicha, muxbir Nurmuhammedova Qarshi shahar hokimligi va televideniye o‘rtasidagi sudni yoritish uchun uchun Samarqand shahridan kelib, Oliy sud ruxsati bilan sudga kirishga muvaffaq bo‘lgan. Biroq sudya jarayonni tasvirga olishga ruxsat bermagan.
“Sudga Oliy suddan ruxsat olib kirganimiz uchunmi ishni ko‘rayotgan sudya bizga o‘ta qo‘pol muomalada bo‘ldi. Operatorga kamerangni o‘chir, men ruxsat bersamgina ‘syomka’ qilasan, deya qo‘pollik qildi. Men bunday qo‘pollikni hali ko‘rmagandim. Eng yomoni sud bunday qilsa yomon bo‘larkan. Xullas, jarayonda Qarshi shahar hokimligi huquqshunosi va televideniye yeriga ega chiqqan tadbirkor sudda bizning qatnashishimizga qarshilik qildi. Shu bois ham sud bizning ishni yoritishimizga ruxsat bermadi. Eng qizig‘i, qaror o‘qilayotgan paytda menga xususiy ajrim chiqarilganini e’lon qilishdi. Sababini so‘rasam, izohlashmadi”, — deydi Mo‘tabar Nurmuhammedova.
“Daryo” muxbiri bilan muloqot qilgan, ammo suhbat jarayoni yozilishiga ruxsat bermagan sudya Baxtiyor Qilichov televideniye muxbiri Mo‘tabar Nurmuhammedovaga uning Milliy gvardiya xodimi bilan bo‘lgan muloqoti sabab xususiy ajrim e’lon qilinganini, nazorati esa prokuraturaga yuklatilganini, biroq xususiy ajrim “Sevimli” telekanaliga yuborilmaganini aytdi.
Sudyaning ta’kidlashicha, ular muxbirning sha’ni, ertaga televideniye bilan hamkorlikda ishlashini o‘ylab, aytgan gapidan qaytgan.
“Men Oliy sudga telefon qilib, viloyat sudyalari ishini aytdim, Keyin, Oliy suddan telefon qilib sud raisi siz bn gaplashib olmoqchi deyishdi. Men qarorga izoh olish uchun ham tasvirchim bilan ortga qaytdim. Bizni rais sud binosi tashqarisidagi eshigi oldida kutib turgan ekan. Gaplashdik. ‘Ajrim chiqarmaydi’, dedi. Men sizdan ajrimni chiqarmaslikni so‘rab kelmadim, izoh so‘rab keldim dedim”, — deydi televideniye muxbiri.
Ma’lum bo‘lishicha, sud muxbirga xususiy ajrim chiqarilganini e’lon qilgach, muxbir Mo‘tabar Nurmuhammedova viloyat ma’muriy sudi raisi bilan muloqot qilmoqchiligini, xususiy ajrim sababini bilolmayotganini aytib, rais bilan ko‘rishishga uringan. Biroq buning imkoni bo‘lmagan.
“Menga xususiy ajrim chiqarishgach, sudyalardan bunga izoh so‘radim. Ular javob bermagach, mas’ullar, xususan, viloyat ma’muriy sudi raisi bilan gaplashish istagim borligini aytdim. Ammo sud raisi bilan ko‘rishish imkoni bo‘lmadi. So‘ngra suddan chiqib bor holat bo‘yicha ‘syomka’ qildim va ortga qaytdim”, — deydi muxbir Nurmuhammedova.
“Daryo” muxbiri bilan suhbatlashgan Qashqadaryo viloyat ma’muriy sudi raisi Xolis Muhammedov muxbirni chaqirtirganini rad etdi.
“Muxbir, balki, qabulimga kelgan bo‘lishi mumkin. Ammo men muxbirni chaqirtirmaganman”, — deydi viloyat ma’muriy sudi raisi Xolis Muhammedov.
Xolis Muhammedov muxbirga xususiy ajrim chiqqani haqidagi voqeadan bexabar ekanligini, buni sud devonxonasidan bilish mumkinligini qo‘shimcha qildi.
Sudya katta yordamchisi, devonxona xodimi mehnat ta’tilida bo‘lgani bois vaqtincha devonxona ishlarini ham bajarib turgan Davron Xayrullayevning ma’lumot berishicha, muxbirga xususiy ajrim chiqarilmagan. Devonxonada bunday hujjat yo‘q.
Oliy sud Qashqadaryo viloyat ma’muriy sudining aytib, aytgan gapidan qaytishiga qanday munosabat bildirar ekan. Kutamiz va mavzuga qaytamiz.
Izoh (0)