Sardoba falokatida jabrlanganlar uchun uyushtirilgan xayriya aksiyasida yig‘ilgan pulga 3 ta tez yordam mashinasi xarid qilindi

Sardoba suv ombori yorilishi oqibatida yuz bergan falokatdan jabr ko‘rganlarga yordam berish uchun bloger Xushnudbek Xudoyberdiyev boshchiligida uyushtirilgan xayriya aksiyasida 19 949 dollar yig‘ildi. Yig‘ilgan mablag‘larga Sirdaryo viloyatining suv toshqinidan zarar ko‘rgan uchta tumani uchun bittadan Damas tez tibbiy yordam mashinasi xarid qilindi. Bu haqda Xushnudbek Xudoyberdiyevning o‘zi Telegram’dagi kanalida ma’lum qildi.

Xabar berilishicha, Sardoba falokati munosabati bilan GoFundMe platformasida tashkil qilingan xayriya aksiyasida, asosan, xorijdagi o‘zbeklar ishtirok etgan va jami 294 kishi ehsonga o‘z hissasini qo‘shgan edi. Saxovatli insonlar yordami bilan 19 949 dollar yig‘ilgan.

Ta’kidlanishicha, yig‘ilgan pullarga imkon qadar suv toshqinidan jabr ko‘rgan uchta tuman fuqarolariga ham birdek foydasi tegadigan umumiy tuhfa qilishga qaror qilingan va tez tibbiy yordam mashinasi olib berish varianti tanlangan.

Sirdaryo viloyatida 28-iyul kuni Sardoba, Mirzaobod, Oqoltin tumanlari tibbiyot birlashmalariga bittadan, jami uchta Damas tez tibbiy yordam mashinasi topshirildi

Xushnudbek Xudoyberdiyevning yozishicha, tuhfa sifatida tez yordam mashinasi tanlanishga quyidagi omillar sabab bo‘lgan.

• hozir insonlar salomatligini saqlash eng muhim masala;
• uzoq yillar tumandagi barcha fuqarolarga xizmat qiladi;
• talon-toroj, tanish-bilish, o‘zlashtirish yoki yeb ketishning iloji yo‘q;
• bir necha yillik faoliyati davomida tez yordam mashinalari insonlar salomatligi uchun xizmat qilsa, ehson qilganlar shuncha yil savobiga sherik bo‘lib turadi.

Xushnudbek Xudoyberdiyev ushbu aksiyada qatnashgan hamda qo‘llab-quvvatlab, o‘z maslahatlari bilan yordam berganlarga cheksiz minnatdorligini bildirdi.

Uning qo‘shimcha qilishicha, yig‘ilgan pul uchta Damas sotib olishga yetmay qolgan. Yetmayotgan 28 million 720 ming so‘m mablag‘ni “O‘zavtosanoat” AJ xayriya sifatida o‘tkazib bergan va mashinalarni juda tez fursatda chiqarishga yordam ko‘rsatgan.

Eslatib o‘tamiz, Sardoba suv ombori to‘g‘oni o‘pirilishi ishi bo‘yicha to‘qqiz kishi qamoqqa olingan.