Сардоба фалокатида жабрланганлар учун уюштирилган хайрия акциясида йиғилган пулга 3 та тез ёрдам машинаси харид қилинди

Сардоба сув омбори ёрилиши оқибатида юз берган фалокатдан жабр кўрганларга ёрдам бериш учун блогер Хушнудбек Худойбердиев бошчилигида уюштирилган хайрия акциясида 19 949 доллар йиғилди. Йиғилган маблағларга Сирдарё вилоятининг сув тошқинидан зарар кўрган учта тумани учун биттадан Damas тез тиббий ёрдам машинаси харид қилинди. Бу ҳақда Хушнудбек Худойбердиевнинг ўзи Telegram’даги каналида маълум қилди.

Хабар берилишича, Сардоба фалокати муносабати билан ГоФундМе платформасида ташкил қилинган хайрия акциясида, асосан, хориждаги ўзбеклар иштирок этган ва жами 294 киши эҳсонга ўз ҳиссасини қўшган эди. Саховатли инсонлар ёрдами билан 19 949 доллар йиғилган.

Таъкидланишича, йиғилган пулларга имкон қадар сув тошқинидан жабр кўрган учта туман фуқароларига ҳам бирдек фойдаси тегадиган умумий туҳфа қилишга қарор қилинган ва тез тиббий ёрдам машинаси олиб бериш варианти танланган.

Сирдарё вилоятида 28 июль куни Сардоба, Мирзаобод, Оқолтин туманлари тиббиёт бирлашмаларига биттадан, жами учта Damas тез тиббий ёрдам машинаси топширилди

Хушнудбек Худойбердиевнинг ёзишича, туҳфа сифатида тез ёрдам машинаси танланишга қуйидаги омиллар сабаб бўлган.

• ҳозир инсонлар саломатлигини сақлаш энг муҳим масала;
• узоқ йиллар тумандаги барча фуқароларга хизмат қилади;
• талон-торож, таниш-билиш, ўзлаштириш ёки еб кетишнинг иложи йўқ;
• бир неча йиллик фаолияти давомида тез ёрдам машиналари инсонлар саломатлиги учун хизмат қилса, эҳсон қилганлар шунча йил савобига шерик бўлиб туради.

Хушнудбек Худойбердиев ушбу акцияда қатнашган ҳамда қўллаб-қувватлаб, ўз маслаҳатлари билан ёрдам берганларга чексиз миннатдорлигини билдирди.

Унинг қўшимча қилишича, йиғилган пул учта Damas сотиб олишга етмай қолган. Етмаётган 28 миллион 720 минг сўм маблағни «Ўзавтосаноат» АЖ хайрия сифатида ўтказиб берган ва машиналарни жуда тез фурсатда чиқаришга ёрдам кўрсатган.

Эслатиб ўтамиз, Сардоба сув омбори тўғони ўпирилиши иши бўйича тўққиз киши қамоққа олинган.