Davlat xizmatlari agentligining axborot xizmati Surxondaryo viloyati boshqarmasi boshlig‘i Zafarjon Akramov 2020-yil 25-iyulda vafot etganini ma’lum qilgan.
“Zafarjon Akramov haqida faqat iliq fikrlar qoldi. Ko‘p yillar malakali huquqshunos sifatida xalq xizmatida bo‘lgan, prokuratura idoralarida faoliyat yuritgan Zafarjon Akramov 2018-yilning mart oyidan Davlat xizmatlari agentligi sohasiga kirib keldi.
Davlat xizmatlari agentligi jamoasi agentlikning Surxondaryo viloyati boshqarmasi boshlig‘i Zafarjon Akramov Chori o‘g‘lining bevaqt vafoti munosabati bilan uning oila a’zolari va yaqinlariga chuqur hamdardlik bildiradi”, – deyilgan agentlik ta’ziyasida.
DXA hududiy boshqarma boshlig‘ining o‘limiga nima sabab bo‘lganini ma’lum qilmagandi. “Kun.uz” marhumning 38 yosh ekani va 2 nafar farzandning otasi ekani haqida yozgan.
Nashr keyinchalik DXA Surxondaryo viloyat boshqarmasi matbuot xizmati bilan bog‘langan. Boshqarma vakili ijtimoiy tarmoqlardagi mish-mishlar asossizligi, Akramovni ancha vaqtdan buyon yurak xastaligi va buyrak yetishmovchiligi bezovta qilib kelganini bildirgan.
2020-yil 16-iyulda Davlat xizmatlari agentligi Navoiy viloyati boshqarmasining mas’ul xodimi Adhamjon Dehqonov koronavirus asoratlaridan vafot etgan. Biroq SSV ushbu holat yuzasidan hanuzgacha rasmiy izoh bermay kelmoqda.
Sog‘liqni saqlash vazirligi 18-iyul kuni Madaniyat vazirligining 32 yoshli xodimi Akmal Irisov koronavirus asoratlaridan vafot etgani, Olmaliq shahri hokimligi 9 va 15-iyul kunlari shahar shifoxonalarida vafot etgan ikki ayolda koronavirus tasdiqlangani haqidagi, 22-iyulda bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov, Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova koronavirus asoratlaridan vafot etgani yuzasidan berilgan xabarlar bo‘yicha ham axborot bermagan.
Izoh (0)