Давлат хизматлари агентлигининг ахборот хизмати Сурхондарё вилояти бошқармаси бошлиғи Зафаржон Акрамов 2020 йил 25 июлда вафот этганини маълум қилган.
«Зафаржон Акрамов ҳақида фақат илиқ фикрлар қолди. Кўп йиллар малакали ҳуқуқшунос сифатида халқ хизматида бўлган, прокуратура идораларида фаолият юритган Зафаржон Акрамов 2018 йилнинг март ойидан Давлат хизматлари агентлиги соҳасига кириб келди.
Давлат хизматлари агентлиги жамоаси агентликнинг Сурхондарё вилояти бошқармаси бошлиғи Зафаржон Акрамов Чори ўғлининг бевақт вафоти муносабати билан унинг оила аъзолари ва яқинларига чуқур ҳамдардлик билдиради», – дейилган агентлик таъзиясида.
ДХА ҳудудий бошқарма бошлиғининг ўлимига нима сабаб бўлганини маълум қилмаганди. «Kun.uz» марҳумнинг 38 ёш экани ва 2 нафар фарзанднинг отаси экани ҳақида ёзган.
Нашр кейинчалик ДХА Сурхондарё вилоят бошқармаси матбуот хизмати билан боғланган. Бошқарма вакили ижтимоий тармоқлардаги миш-мишлар асоссизлиги, Акрамовни анча вақтдан буён юрак хасталиги ва буйрак етишмовчилиги безовта қилиб келганини билдирган.
2020 йил 16 июлда Давлат хизматлари агентлиги Навоий вилояти бошқармасининг масъул ходими Адҳамжон Деҳқонов коронавирус асоратларидан вафот этган. Бироқ ССВ ушбу ҳолат юзасидан ҳанузгача расмий изоҳ бермай келмоқда.
Соғлиқни сақлаш вазирлиги 18 июль куни Маданият вазирлигининг 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақидаги, 22 июлда бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов, Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова коронавирус асоратларидан вафот этгани юзасидан берилган хабарлар бўйича ҳам ахборот бермаган.
Изоҳ (0)