Rossiyaning Samara viloyatida o‘zbekistonlikni do‘pposlagan politsiyachilarga nisbatan jinoiy ish ochildi

Rossiya Tergov qo‘mitasining Privoljskiy transport tergov bo‘limi Samaradagi temiryo‘l vokzalida ikki nafar politsiyachining O‘zbekiston fuqarosini kaltaklagani yuzasidan jinoiy ish ochdi. Bu haqda hudud transport porokuraturasining axborotiga tayanib “Interfaks” xabar qilgan.

Hodisa 2020-yil 15-iyulda sodir bo‘lgan. Politsiya xodimlariga ayblov e’lon qilingan va vaqtinchalik qamoqqa olish, yashash hududidan chiqarmaslik tarzidagi ehtiyot choralari qo‘llanilgan.

Jinoyat ishi Rossiya Jinoyat kodeksining 286-moddasi 3-qismi “a” bandi (Mansab vakolatlarini kuch ishlatish va zo‘ravonlik yo‘li bilan suiiste’mol qilish) bilan ochilgan. Rossiya IIV Srednovoljsk transport tarmog‘i boshqarmasi xodimlari gumonlanuvchi tariqasida ishga jalb qilingan.

Transport politasiyasi rahbariyatiga xodimlarning ishiga idoraviy nazoratni kuchaytirish bo‘yicha ko‘rsatma yuborilishi kutilmoqda.

Ayni vaqtda ikkala politsiya xodimi ham ishdan haydalgan. Ularning bevosita rahbarlariga ma’muriy jazo choralari ko‘rilgan.

Jinoyat ishini tergov qilish Rossiya Tergov qo‘mitasining nazoratiga olingan.

Vaziyat bilan juda yaxshi tanish “Interfaks” manbasining xabar qilishicha, nizo politsiyachilarning fuqarodan hujjat talab qilishi oqibatida kelib chiqqan.

“Transport politsiyasi xodimlari O‘zbekiston fuqarosidan hujjatlarini ko‘rsatishni so‘ragan. Ulardan biri noma’lum sababga ko‘ra fuqaroni urgan”, — deydi “Interfaks” manbasi.

Eslatib o‘tamiz, 13-iyul kuni Amur viloyatidagi Renaissance Heavy Industries kompaniyasiga tegishli vaqtinchalik vaxta shaharchasida O‘zbekiston fuqarolari ishtirokida isyon yuz bergan. Ishchilarning so‘zlariga ko‘ra, ular uch oydan buyon ish haqini olmayotgani sababli mazkur ishga qo‘l urgan.

Amur viloyati gurbernatori Vasiliy Orlov Renaissance Heavy Industries pudratchi kompaniyasi vakillari hamda Amur gazni qayta ishlash zavodi quruvchilari o‘rtasidagi to‘qnashuvdan keyin ishchilarga turli shakldagi yordamlar taklif qilinganini bildirdi.

O‘zbekistonning Rossiyadagi elchixonasi Amurdagi o‘zbekistonlik ishchilar isyoni nazoratga olinganini, voqea joyiga bosh konsul yetib borganini xabar berdi. Keyinroq O‘zbekiston Tashqi ishlar vazirligi mazkur mojaro hal etilgani va o‘zbekistonlik quruvchilar o‘z ish joyiga qaytganini ma’lum qildi.

17-iyulda esa Sankt-Peterburgdagi “Laxta sentr”da ishlovchi o‘zbekistonlik quruvchilar maosh talab qilib norozilik namoyishi o‘tkazgan.