Россиянинг Самара вилоятида ўзбекистонликни дўппослаган полициячиларга нисбатан жиноий иш очилди

Россия Тергов қўмитасининг Приволжский транспорт тергов бўлими Самарадаги темир йўл вокзалида икки нафар полициячининг Ўзбекистон фуқаросини калтаклагани юзасидан жиноий иш очди. Бу ҳақда ҳудуд транспорт порокуратурасининг ахборотига таяниб «Интерфакс» хабар қилган.

Ҳодиса 2020 йил 15 июлда содир бўлган. Полиция ходимларига айблов эълон қилинган ва вақтинчалик қамоққа олиш, яшаш ҳудудидан чиқармаслик тарзидаги эҳтиёт чоралари қўлланилган.

Жиноят иши Россия Жиноят кодексининг 286-моддаси 3-қисми «а» банди (Мансаб ваколатларини куч ишлатиш ва зўравонлик йўли билан суиистеъмол қилиш) билан очилган. Россия ИИВ Средноволжск транспорт тармоғи бошқармаси ходимлари гумонланувчи тариқасида ишга жалб қилинган.

Транспорт политасияси раҳбариятига ходимларнинг ишига идоравий назоратни кучайтириш бўйича кўрсатма юборилиши кутилмоқда.

Айни вақтда иккала полиция ходими ҳам ишдан ҳайдалган. Уларнинг бевосита раҳбарларига маъмурий жазо чоралари кўрилган.

Жиноят ишини тергов қилиш Россия Тергов қўмитасининг назоратига олинган.

Вазият билан жуда яхши таниш «Интерфакс» манбасининг хабар қилишича, низо полициячиларнинг фуқародан ҳужжат талаб қилиши оқибатида келиб чиққан.

«Транспорт полицияси ходимлари Ўзбекистон фуқаросидан ҳужжатларини кўрсатишни сўраган. Улардан бири номаълум сабабга кўра фуқарони урган», — дейди «Интерфакс» манбаси.

Эслатиб ўтамиз, 13 июль куни Амур вилоятидаги Renaissance Heavy Industries компаниясига тегишли вақтинчалик вахта шаҳарчасида Ўзбекистон фуқаролари иштирокида исён юз берган. Ишчиларнинг сўзларига кўра, улар уч ойдан буён иш ҳақини олмаётгани сабабли мазкур ишга қўл урган.

Амур вилояти гурбернатори Василий Орлов Renaissance Heavy Industries пудратчи компанияси вакиллари ҳамда Амур газни қайта ишлаш заводи қурувчилари ўртасидаги тўқнашувдан кейин ишчиларга турли шаклдаги ёрдамлар таклиф қилинганини билдирди.

Ўзбекистоннинг Россиядаги элчихонаси Амурдаги ўзбекистонлик ишчилар исёни назоратга олинганини, воқеа жойига бош консул етиб борганини хабар берди. Кейинроқ Ўзбекистон Ташқи ишлар вазирлиги мазкур можаро ҳал этилгани ва ўзбекистонлик қурувчилар ўз иш жойига қайтганини маълум қилди.

17 июлда эса Санкт-Петербургдаги «Лахта центр»да ишловчи ўзбекистонлик қурувчилар маош талаб қилиб норозилик намойиши ўтказган.