Sirdaryo viloyati hokimi G‘ofurjon Mirzayev viloyatda koronavirus pandemiyasi bilan bog‘liq holat yuzasidan brifing o‘tkazdi. Bu haqda Sirdaryo viloyati hokimligi xabar berdi.
G‘ofurjon Mirzayevning ma’lum qilishicha, viloyatda bugungi kunda koronavirusni yuqtirib olgan 190 nafar fuqaro davolanmoqda. Ulardan 57 nafari statsionar sharoitda, qolgan 133 nafari uy sharoitda davolanishda bo‘lib turibdi. 31 nafar bemorda pnevmoniya holati aniqlangan, birorta ham bemor sun’iy nafas oldirish apparatlariga ulanmagan. Hozirga qadar 194 nafar fuqaro kasallikdan to‘liq sog‘aygan. Uy sharoitida davolangan 22 nafar bemor kasallikdan tuzalishga muvaffaq bo‘lgan.
Viloyat hududida karantin boshlangandan buyon 385 nafar fuqaroda kasallik aniqlandi, shundan 140 nafari “Guliston” chegara postidan o‘tgan xalqaro yuk tashuvchilar hamda chet davlatlardan kelgan fuqarolar bo‘lsa, qolgan 245 nafari Sirdaryo viloyati fuqarolari hisoblanadi.
So‘nggi 3 kun ichida viloyatda 124 holatda infeksiya tasdiqlandi. Viloyatdagi sanitariya epidemiologik vaziyat murakkab bo‘lib qolmoqda. Viloyatdagi 224 ta mahalladan 97 tasida kasallik aniqlangan.
Hokimning so‘zlariga ko‘ra, viloyat hokimligi hamda tegishli mutasaddi tashkilotlar tomonidan zarur chora-tadbirlar amalga oshirilmoqda. 3 ming kishiga yetadigan zaxira o‘rinlari shakllantirildi, dori-darmon uchun 3 milliard so‘m mablag‘ ajratildi, viloyat shoshilinch tez tibbiy yordam markazi uchun qo‘shimcha 14 ta avtomashina xarid qilindi, Call-markaz ishga tushirildi, aloqasi mavjud bo‘lmagan 55 ta qishloq vrachlik puntklariga telefon aloqasi o‘rnatildi.
Ichki ishlar va Milliy gvardiya xodimlarining hamkorlikdagi reyd tadbirlari davomida bir kunda 389 ta, tadbir boshidan esa 1857 ta karantin qoidalarini buzish holati aniqlangan. Shuningdek, 1204 ta avtotransport vositasida harakatlanish qoidalarini buzish holati aniqlanib, 222 ta avtotransport jarima maydoniga joylashtirilgan.
Sirdaryo viloyati tibbiyot muassasalarida 96 ta sun’iy nafas oldirish uskunasi, 95 ta SPAP (o‘pka ventilyatsiyasi), 57 ta kardimonitor, 78 ta puls o‘lchash apparati, statsionar rentgen apparatlari mavjud. “Tibbiyot muassasalarimiz yetarli dori-darmon, malakali shifokor va kichik tibbiyot xodimlari bilan ta’minlangan. Laboratoriyalarimiz uzluksiz ish rejimiga o‘tgan”, — deya ta’kidladi viloyat rahbari.
Shuningdek, G‘ofurjon Mirzayev viloyat fuqarolarida biror-bir muammo yoki savol tug‘ilsa, kunning istalgan vaqtida +99867 226-10-03 raqamiga murojaat qilishlari mumkinligini aytdi.
Hokimning qayd etishicha, ayrim fuqarolar uy sharoitda o‘zini o‘zi davolashga o‘tganligi sababli kasallik rivojlanib, pnevmoniya darajasiga o‘tib ketmoqda.
Eslatib o‘tamiz, G‘ofurjon Mirzayev Sirdaryo viloyatida koronavirus asoratlari oqibatida vafot etgan ilk bemor tibbiyot xodimi bo‘lganini ma’lum qilgandi.
Izoh (0)