2020-yilning 20-iyul kuni Xalqaro press-klubning koronavirusga qarshi kurash va pandemiya davrida aholini qo‘llab-quvvatlash bo‘yicha amalga oshirilayotgan chora-tadbirlar muhokamasiga bag‘ishlangan navbatdagi sessiyasi bo‘lib o‘tdi. Bu haqda “Daryo” muxbiri xabar bermoqda.
Sessiyada qatnashgan Sanitariya-epidemiologiya nazorati davlat inspeksiyasi boshlig‘i Nurmat Otabekovning aytishicha, koronavirusga qarshi kurashda xalq asosiy ishtirokchiga aylansagina, uni yengish mumkin.
“O‘zbekiston aholisining barchasi yoppasiga test topshiradigan bo‘lsa, PZR apparatlari bir yoqda tursin, umuman, tibbiyotni tanazzulga uchratishimiz mumkin. Oldingi karantin vaqtida kuniga 3 mingta tahlil o‘tkazar edik. Hozir esa bir sutkada 30 mingga yaqin tahlil o‘tkazilyapti. Bundan ko‘rinib turibdiki, agar hammamiz shu kabi ixtiyor bildiradigan bo‘lsak, tekshirishga muhtoj aholini qiyin ahvolga solib qo‘yamiz.
Shuning uchun endilikda shifoxonaga yotqizishdan oldin tahlil natijalariga emas, rentgen, ya’ni multispiral kompyuter tomograf natijalariga ahamiyat qaratish va o‘pkadagi muammolarning boshlanish paytida davolashni yo‘lga qo‘yish maqsad qilingan.
O‘ylaymanki, biz o‘zimizga o‘zimiz xulosa chiqardik. Agar bu kasallikka chalinganlarning barchasini davolash imkoniyati bor, deydigan bo‘lsak, katta xato bo‘ladi. Bu murakkab masala. Koronavirusdan vafot etganlar soni 90 nafarga yaqinlashyapti. Bu raqamlar ham ortib bormoqda.
Hozir koronavirusga qarshi kurash uchun hamma safarbar etilgan. Tibbiyot tizimidagi 75 ming nafar shifokor, 440 ming nafarga yaqin o‘rta tibbiyot xodimining qo‘lidan hech narsa kelmaydi. Qachonki xalq bu harakatning boshida bo‘larkan, jarayonni asosiy ishtirokchisiga aylanarkan, bunga ta’sir qilishimiz mumkin.
Epidemiologik jarayonning uchta bo‘g‘ini bor — manba, yuqish yo‘li va yuqtirib oluvchi shaxs. Biz qaysi birini ‘o‘yin’dan chiqarsak, kasallikni jilovlash imkoniyatiga ega bo‘lamiz?”, — dedi Nurmat Otabekov.
Eslatib o‘tamiz, Sog‘liqni saqlash vazirligi statistikasi bo‘yicha koronavirus asoratlaridan vafot etganlar soni 90 nafarga yetdi, “Daryo” hisob-kitobiga ko‘ra esa O‘zbekistondagi o‘lim holatlari 92 tani tashkil etmoqda. Davlat xizmatlari agentligi 15-iyul kuni Navoiy viloyatidagi 61 yoshli xodimi Adhamjon Dehqonov, Madaniyat vazirligi esa 18-iyul kuni 32 yoshli xodimi Akmal Irisov vafot etganini e’lon qilgan, biroq ushbu holatlar SSV tomonidan ayni vaqtgacha tasdiqlangani yo‘q.
Avvalroq Nurmat Otabekov O‘zbekiston aholisida koronavirusga qarshi antitana tahlilini o‘tkazish rejalashtirilayotganini ma’lum qilgandi.
Izoh (0)