Сирдарё вилояти ҳокими Ғофуржон Мирзаев вилоятда коронавирус пандемияси билан боғлиқ ҳолат юзасидан брифинг ўтказди. Бу ҳақда Сирдарё вилояти ҳокимлиги хабар берди.
Ғофуржон Мирзаевнинг маълум қилишича, вилоятда бугунги кунда коронавирусни юқтириб олган 190 нафар фуқаро даволанмоқда. Улардан 57 нафари стационар шароитда, қолган 133 нафари уй шароитда даволанишда бўлиб турибди. 31 нафар беморда пневмония ҳолати аниқланган, бирорта ҳам бемор сунъий нафас олдириш аппаратларига уланмаган. Ҳозирга қадар 194 нафар фуқаро касалликдан тўлиқ соғайган. Уй шароитида даволанган 22 нафар бемор касалликдан тузалишга муваффақ бўлган.
Вилоят ҳудудида карантин бошлангандан буён 385 нафар фуқарода касаллик аниқланди, шундан 140 нафари «Гулистон» чегара постидан ўтган халқаро юк ташувчилар ҳамда чет давлатлардан келган фуқаролар бўлса, қолган 245 нафари Сирдарё вилояти фуқаролари ҳисобланади.
Сўнгги 3 кун ичида вилоятда 124 ҳолатда инфекция тасдиқланди. Вилоятдаги санитария эпидемиологик вазият мураккаб бўлиб қолмоқда. Вилоятдаги 224 та маҳалладан 97 тасида касаллик аниқланган.
Ҳокимнинг сўзларига кўра, вилоят ҳокимлиги ҳамда тегишли мутасадди ташкилотлар томонидан зарур чора-тадбирлар амалга оширилмоқда. 3 минг кишига етадиган захира ўринлари шакллантирилди, дори-дармон учун 3 миллиард сўм маблағ ажратилди, вилоят шошилинч тез тиббий ёрдам маркази учун қўшимча 14 та автомашина харид қилинди, Call-марказ ишга туширилди, алоқаси мавжуд бўлмаган 55 та қишлоқ врачлик пунткларига телефон алоқаси ўрнатилди.
Ички ишлар ва Миллий гвардия ходимларининг ҳамкорликдаги рейд тадбирлари давомида бир кунда 389 та, тадбир бошидан эса 1857 та карантин қоидаларини бузиш ҳолати аниқланган. Шунингдек, 1204 та автотранспорт воситасида ҳаракатланиш қоидаларини бузиш ҳолати аниқланиб, 222 та автотранспорт жарима майдонига жойлаштирилган.
Сирдарё вилояти тиббиёт муассасаларида 96 та сунъий нафас олдириш ускунаси, 95 та СПАП (ўпка вентиляцияси), 57 та кардимонитор, 78 та пульс ўлчаш аппарати, стационар рентген аппаратлари мавжуд. «Тиббиёт муассасаларимиз етарли дори-дармон, малакали шифокор ва кичик тиббиёт ходимлари билан таъминланган. Лабораторияларимиз узлуксиз иш режимига ўтган», — дея таъкидлади вилоят раҳбари.
Шунингдек, Ғофуржон Мирзаев вилоят фуқароларида бирор-бир муаммо ёки савол туғилса, куннинг исталган вақтида +99867 226-10-03 рақамига мурожаат қилишлари мумкинлигини айтди.
Ҳокимнинг қайд этишича, айрим фуқаролар уй шароитда ўзини ўзи даволашга ўтганлиги сабабли касаллик ривожланиб, пневмония даражасига ўтиб кетмоқда.
Эслатиб ўтамиз, Ғофуржон Мирзаев Сирдарё вилоятида коронавирус асоратлари оқибатида вафот этган илк бемор тиббиёт ходими бўлганини маълум қилганди.
Изоҳ (0)