“O‘zkomnazorat” davlat inspeksiyasi Teleradioeshittirish bo‘limi boshlig‘i Kozim Saidov 19-iyul kuni 51 yoshida vafot etdi. Bu haqda inspeksiya matbuot xizmati xabar berdi.
Xabarda Saidov o‘limi sababiga oydinlik kiritilmagan.
Ma’lumot uchun, Kozim Saidov – 1969-yilda Toshkent shahrida tug‘ilgan. Mehnat faoliyatini 1989-yilda boshlab, “Respublika radioeshittirish va ovoz yozish uyi”, O‘zbekiston aloqa va axborotlashtirish agentligi Ommaviy kommunikatsiyalar sohasidagi monitoring markazida turli lavozimlarda ishlab, boshliqning birinchi o‘rinbosarigacha bo‘lgan yo‘lni bosib o‘tgan, Axborotlashtirish va telekommunikatsiyalar sohasida nazorat bo‘yicha davlat inspeksiyasida ham turli yuqori lavozimlarda ishlagan. 2019-yildan buyon Teleradioeshittirish bo‘limi boshlig‘i sifatida mehnat faoliyatini olib borayotgandi.
“Kozim aka mehnat jamoasida katta obro‘ga ega, talabchan, o‘z ishiga mas’uliyatli, shogirdlarning mehribon ustozi, o‘z kasbining ustasi, fidoyi inson edi. Jamoada hammaga imkon darajasida yordam qilishga shoshilardi. ‘O‘zkomnazorat’ DI mehnat jamoasi marhumning oila-a’zolari va yaqinlariga hamdardlik bildiradi”, — deyiladi xabarda.
Avvalroq Monopoliyaga qarshi kurashish qo‘mitasining 40 yoshli boshqarma boshlig‘i, Madaniyat vazirligining 32 yoshli xodimi, Muzrabot tumani hokimligining 35 yoshli bo‘lim boshlig‘i o‘rinbosari vafot etgani haqida xabar berilgan edi. Shuningdek, Madaniyat vazirligining xodimi va Muzrabot tumani hokimligining bo‘lim boshlig‘i o‘rinbosari koronavirusga chalingani tasdiqlangan.
O‘zbekistonda 20-iyul soat 10:00 holatiga ko‘ra, koronavirus infeksiyasi qayd etilganlar soni 16 966 nafarga yetgan. Ayni paytda mamlakatda 9279 nafar koronavirus infeksiyasiga chalingan fuqaro (55 foiz) sog‘aygan, mamlakatda COVID-19 oqibatida vafot etganlar soni 90 kishiga yetgan.
Izoh (0)