«Ўзкомназорат» давлат инспекцияси Телерадиоэшиттириш бўлими бошлиғи Козим Саидов 19 июль куни 51 ёшида вафот этди. Бу ҳақда инспекция матбуот хизмати хабар берди.
Хабарда Саидов ўлими сабабига ойдинлик киритилмаган.
Маълумот учун, Козим Саидов – 1969 йилда Тошкент шаҳрида туғилган. Меҳнат фаолиятини 1989 йилда бошлаб, «Республика радиоэшиттириш ва овоз ёзиш уйи», Ўзбекистон алоқа ва ахборотлаштириш агентлиги Оммавий коммуникациялар соҳасидаги мониторинг марказида турли лавозимларда ишлаб, бошлиқнинг биринчи ўринбосаригача бўлган йўлни босиб ўтган, Ахборотлаштириш ва телекоммуникациялар соҳасида назорат бўйича давлат инспекциясида ҳам турли юқори лавозимларда ишлаган. 2019 йилдан буён Телерадиоэшиттириш бўлими бошлиғи сифатида меҳнат фаолиятини олиб бораётганди.
«Козим ака меҳнат жамоасида катта обрўга эга, талабчан, ўз ишига масъулиятли, шогирдларнинг меҳрибон устози, ўз касбининг устаси, фидойи инсон эди. Жамоада ҳаммага имкон даражасида ёрдам қилишга шошиларди. ‘Ўзкомназорат’ ДИ меҳнат жамоаси марҳумнинг оила-аъзолари ва яқинларига ҳамдардлик билдиради», — дейилади хабарда.
Аввалроқ Монополияга қарши курашиш қўмитасининг 40 ёшли бошқарма бошлиғи, Маданият вазирлигининг 32 ёшли ходими, Музработ тумани ҳокимлигининг 35 ёшли бўлим бошлиғи ўринбосари вафот этгани ҳақида хабар берилган эди. Шунингдек, Маданият вазирлигининг ходими ва Музработ тумани ҳокимлигининг бўлим бошлиғи ўринбосари коронавирусга чалингани тасдиқланган.
Ўзбекистонда 20 июль соат 10:00 ҳолатига кўра, коронавирус инфекцияси қайд этилганлар сони 16 966 нафарга етган. Айни пайтда мамлакатда 9279 нафар коронавирус инфекциясига чалинган фуқаро (55 фоиз) соғайган, мамлакатда COVID-19 оқибатида вафот этганлар сони 90 кишига етган.
Изоҳ (0)