Toshkentning Yunusobod tumanidan o‘tuvchi Ahmad Donish ko‘chasida yo‘l-qurilish ishlari boshlandi. Bu haqda poytaxt hokimligi matbuot xizmati xabar berdi.
Ma’lum qilinishicha, uzunligi 2,2 kilometrni tashkil etadigan yo‘l oralig‘ida piyodalar yo‘lagi, veloyo‘laklar, yashil hudud va shunga o‘xshash yana bir qator loyihalar o‘rin olgan.
“Bu yo‘l oldingi yo‘llardan farqli ravishda barcha xalqaro standartlarga mos yo‘l bo‘lyapti. Yo‘l Nurafshon ko‘chadan kelib chiqib Katta halqa avtomobil yo‘liga ulanadi. Bundan tashqari, mahalliy yo‘llarimiz domlar va mahallalarga kirib ketadi. Yo‘l chetida do‘konlarga va avtoturargohlar mo‘ljallangan,
Shuningdek, yashil hududni saqlab qoldik. Asosiy e’tiborni chorrahaga qaratdik. Bizda xavfsiz chorraha bo‘lishi kerak”, — deydi Toshkent shahar hokimi o‘rinbosari Davron Xidoyatov.
Hokim o‘rinbosarining ta’kidlashicha, chorraha o‘qi bir-biridan farq qiladi, bu esa qayrilayotgan mashinalarning boshqalarga xalaqit bermasligiga xizmat qiladi.
“Ahmad Donish ko‘prigidan tushilganida ikki taraflama yo‘l bir tarafli bo‘lmoqda, shu yerdagi hudud aylanma vazifasini bajaradi. Yo‘llar eni 6 qator bo‘lyapti. Bundan tashqari, mahalliy yo‘llarimiz ikki qatordan — 8 va 26 metr”, — deydi Xidoyatov.
Ta’kidlanishicha, hozirga qadar 94 ming kub yer ishlari olib borilgan, to‘liq bitkazish uchun 200 ming kub yer ishlari olib boriladi. Loyihaga pudratchi sifatida “O‘zavtoyo‘l” davlat qo‘mitasining “Transyo‘lqurilish” korxonasi jalb etilgan.
Qurilish ishlari uch bosqichda amalga oshirilib, ilk jarayon sentabr oyida yakunlanishi kutilmoqda. Qolgan bosqichlarda esa Amir Temur va Ahmad Donish ko‘chalarini o‘zaro birlashtiruvchi aylanma yo‘l va yangidan ochilishi kutilayotgan Yunusota ko‘chasini ta’mirlash, qurilish ishlari amalga oshiriladi.
Yunusobod tumanidagi yo‘lning butkul yakunlanishi noyabr oyiga rejalashtirilmoqda.
Avvalroq 2020—2021-yillar Toshkent shahrini kuz-qish mavsumiga tayyorlash dasturi doirasida Ahmad Donish ko‘chasining Anorzor ko‘chasiga burilish uchun mo‘ljallangan qo‘shimcha ko‘chadan o‘tuvchi magistral issiqlik tarmog‘ini kapital ta’mirlash ishlari boshlanayotgani to‘g‘risida xabar berilgandi.
Eslatib o‘tamiz, iyun oyida Toshkent metrosining “Yunusobod” yo‘lidagi 2 ta yangi bekat qurib bitkazilgan edi. Metroning yangi yo‘nalishlari Ahmad Donish ko‘chasidan o‘tgan. Ko‘chani ta’mirlash ishlari metro yo‘nalishlari yakunlanganidan so‘ng boshlangan.
Izoh (0)