Toshkentda o‘zini Prezident administratsiyasida ishlovchi shaxs sifatida tanishtirib, firibgarlik bilan shug‘ullangan shaxs qo‘lga olindi. Bu haqda “O‘zbekiston 24” kanalida xabar berildi.
Ma’lumotlarga ko‘ra, 2020-yilning mart oyida Toshkent shahridagi xususiy klinikalardan birining rahbariga noma’lum kimsa qo‘ng‘iroq qilib, o‘zini Prezident administratsiyasida yuqori lavozimda ishlovchi shaxs sifatida tanishtirgan va uning qabuliga bir ona-bolani yuborayotganligini, zudlik bilan tibbiy muolaja ko‘rsatishi kerakligini tayinlagan.
Klinika rahbari uning rasmiy ohangdagi muomalasidan hech bir shubhaga bormasdan, qabuliga kelgan ayolning bolasini tekshiruvlardan o‘tkazadi. Natijada bolaning burnidagi o‘simtani jarrohlik yo‘li bilan olib tashlash zarurligi ayon bo‘ladi. Garchi bunday operatsiya o‘zining shifoxonasida amalga oshirilmasa-da, u 7,5 million so‘m sarflab, boshqa klinikada bu topshiriqni bajaradi.
Oradan bir oz muddat o‘tib, yuqoridagi shaxs klinika rahbariga yana qo‘ng‘iroq qiladi va ko‘rsatgan xizmati uchun minnatdorchilik bildirib, endi unga yaxshilik qilmoqchi ekanligini aytadi. Ya’ni Toshkent shahridagi ko‘p qavatli uylarda egasiz, deb topilgan 11 ta xonadon borligini, ularning har birini 10 ming AQSh dollaridan jami 110 ming AQSh dollariga olib berishini bildiradi.
Uning gaplariga ishongan klinika rahbari arzon narxda taklif qilingan uylarni olishga rozi bo‘ladi va firibgar yuborgan odamga 10 ming AQSh dollarini dastlabki to‘lov sifatida beradi.
Iyul oyiga kelib esa, u yana qo‘ng‘iroq qiladi va go‘yoki shahar hokimining 11 ta xonadonga egalik huquqini beruvchi qarori chiqqanligini va buning uchun dastlab 50 ming AQSh dollari berishini, qolgan qismini esa ish to‘liq hal bo‘lganidan keyin berishi kerakligini aytadi.
DXX va IIV xodimlari hamkorligida o‘tkazilgan tezkor tadbir davomida firibgarning nomidan kelgan uning turmush o‘rtog‘i va hamtovog‘i xususiy klinika rahbaridan 50 ming AQSh dollarini olayotgan vaqtida ashyoviy dalillar bilan ushlangan.
So‘ngra Toshkent shahridagi vaqtinchalik yashash manzilida firibgarning o‘zi – 1983-yilda tug‘ilgan X.B. ham qo‘lga olingan.
Sirdaryo viloyatining Sayxunobod tumanida istiqomat qiluvchi, hech qayerda ishlamaydigan ushbu shaxsning bunga qadar ham shu turdagi firibgarliklarni amalga oshirgani ma’lum bo‘lgan. Aniqlanishicha, u avval “Janubiy Koreya davlatiga ishlash uchun yuboraman”, “respublikadagi oliy ta’lim muassasalariga o‘qishga kiritib qo‘yaman”, deya fuqarolarni aldab kelgan va Jinoyat kodeksining 168-moddasi (Firibgarlik) bilan ayblanib, to‘rt marotaba sudlangan.
Hozirda mazkur holat yuzasidan Jinoyat kodeksining tegishli moddasiga asosan jinoyat ishi qo‘zg‘atilib, tergov harakatlari doirasida undan jabr ko‘rgan boshqa fuqarolarni aniqlash bo‘yicha zarur chora-tadbirlar amalga oshirilmoqda.
Avvalroq Namanganda soxta DXX xodimlarining bir fuqaroni qo‘rqitib 150 ming dollar pulni olib qo‘ygani to‘g‘risida xabar berilgandi.
Izoh (0)