“Toshkentda yo‘l qo‘yilgan xatolardan to‘g‘ri xulosa chiqarish kerak”. Deputat hududlarni ikkinchi to‘lqinga tayyorlash choralarini taklif etdi

Oliy Majlis Qonunchilik palatasi deputat Doniyor G‘aniyev koronavirus pandemiyasining ikkinchi to‘lqini mamlakat tibbiyot tizimi bosimga tayyor emasligini ochiq-oydin ko‘rsatib qo‘yganini ma’lum qildi. Deputat o‘zining Telegram’dagi kanali orqali Toshkent shahrida yo‘l qo‘yilgan xatolardan to‘g‘ri xulosa chiqargan holda, hududlarni ikkinchi to‘lqin bosimiga tayyorlash choralarini ko‘rishni tavsiya etgan.

O‘zbekistonda koronavirus pandemiyasining ikkinchi to‘lqini ko‘plab muammolarni keltirib chiqargani, ayniqsa, Toshkent shahri va Toshkent viloyatida sezilib qoldi. Testlar yetishmasligi, kasallik alomati bor fuqarolarga tez yordam vaqtida ko‘rsatilmagani yoki ularni qabul qilishga shifoxonalarda joy qolmaganligi, aptekalarda dori-darmonlar tanqisligi, uyda davolanish uchun zarur qo‘llanmalar ishlab chiqilmagani, shifokorlarning zarur himoya vositalari va tibbiy uskunalar bilan to‘liq ta’minlanmaganligi kabi muammolar tibbiyot tizimimiz ikkinchi to‘lqin bosimiga (orada 4 oy vaqt bo‘lishiga qaramay) afsus, tayyor emasligiga hammamiz guvoh bo‘ldik.

Bu haqda ijtimoiy tarmoqlarda fuqarolar va blogerlar juda ko‘plab tanqidiy fiklar va maqolalar e’lon qildi. Lekin hozir aybdorni izlashdan foyda yo‘q, ehtimol koronavirusdan qutulgach, yo‘l qo‘yilgan kamchilik va xatolarni parlament tekshiruvi asosida shoshmay o‘rganib, aybdor mas’ul shaxslarga chora ko‘rish imkoni bo‘lar (orzuga ayb yo‘q).

Aksincha, hozir birinchi navbatda, Toshkent shahrida yo‘l qo‘yilgan xatolardan to‘g‘ri xulosa chiqargan holda, hududlarni ikkinchi to‘lqin bosimiga, ayniqsa, gripp va shamollash kuchayadigan kuz-qish mavsumiga tayyorlash choralarini ko‘rish muhim deb o‘ylayman.

• Birinchidan, virusga chalingan fuqarolarni yotqizish uchun hududdagi mavjud sanatoriyalar, kollej, litsey va maktablarning sport zallarida qisqa muddatlarda maxsus davolanish markazlarini tashkil etish orqali minglab yangi zaxira o‘rinlar (koyka) yaratish hamda boshqa kasalliklar bilan chalingan fuqarolarga yordam ko‘rsatuvchi shifoxonalar quvvatini qisqartirmaslikka alohida e’tibor qaratish;
• Ikkinchidan, tez yordam avtomobillariga ehtiyoj ko‘payishini inobatga olib mavjud avtomobillarni to‘liq texnik ko‘rikdan o‘tkazish, shuningdek, hududlarda yo‘nalishli taksi xizmati ko‘rsatuvchi tashkilot va fuqarolarning Damas (yoki boshqa minivenlar) avtomobillarini ijara va volontyorlik asosida tez yordam xizmati ko‘rsatish uchun jalb qilish orqali zaxira quvvat yaratish choralarini ko‘rish;
• Uchinchidan, hududlarda hamshira va shifokorlarning yetishmaslik holatlarini oldini olish uchun hozirda nafaqada/ishlamayotgan malakali shifokorlarni hamda ishsiz bo‘lib turgan o‘rta maxsus diplomiga ega hamshiralarni mavsumiy yollash va ularni yangi tashkil etilayotgan maxsus karantin/davolanish markazlariga, tez tibbiy yordam avtomobillariga ro‘yxat asosida biriktirish;
• To‘rtinchidan, har bir shahar va tumanlarda eng kamida 10 tadan kislorod konsentratorlari, pulsoksimetr zaxirasini tayyorlash;
• Beshinchidan, test natijalarini aniqlaydigan PZR laboratoriyalar sonini oshirish hamda testlar zahirasini shakllantirish;
• Va, albatta, karantin choralarini saqlab qolish va unga qat’iy amal qilinishini taminlash.

Doniyor G‘aniyev, Oliy Majlis Qonunchilik palatasi deputat

Avvalroq Prezident Shavkat Mirziyoyev 20-iyul kuni erta tongdan O‘zbekistonda koronavirus infeksiyasiga qarshi kurash borasida olib borilayotgan ishlarning chuqur tanqidiy tahliliga bag‘ishlangan videoselektor yig‘ilishi o‘tkazgani to‘g‘risida xabar berilgandi. Yig‘ilishda Prezident qisqa muddatlarda kasallikka chalinganlarni davolash uchun yaratilgan qo‘shimcha o‘rin-joylar sonini oshirish lozimligi ta’kidlangan.Eslatib o‘tamiz, Prezident 14-iyul kuni o‘tkazilgan videoselektorda koronavirusga qarshi kurash uchun mamlakatda barcha zaxira va imkoniyatlar mavjudligini ta’kidlagan, biroq hozirda epidemiologik vaziyat juda og‘irligini aytgandi. Shuningdek, davlat rahbari koronavirusni aniqlash uchun test topshirish jarayonini soddalashtirish, hududlarda uch oylik dori zaxirasini yaratish hamda dorixonalarda va bozorlarda narxlar oshishining oldini olish, zarur joylarda karantin choralarini kuchaytirish bo‘yicha topshiriq bergan.