Sog‘liqni saqlash vazirligi koronavirusga chalingan yana bir bemor o‘tkir yurak-qon tomir va nafas yetishmovchiligidan vafot etganini xabar qildi.
Toshkent shahri Shayxontohur tumanida yashagan 49 yoshli A.A. ismli erkakda 14-iyul kuni COVID-19 tasdiqlangan va Virusologiya ilmiy tekshirish instituti klinikasiga yotqizilgan.
Unga COVID-19 infeksiyasining o‘ta og‘ir kechishi, ikki tomonlama pnevmoniya tashxisi qo‘yilgan. Bemorda gipertoniya, arterial gipertenziya kabi hamroh kasalliklar ham aniqlangan.
Bemorga mutaxassislar tomonidan onlayn konsultatsiya va konsiliumlar o‘tkazilgan, davolash jarayoni belgilangan standartlar asosida olib borilgan.
17-iyul kuni mutaxassislar tomonidan to‘liq hajmda, standart asosida o‘tkazilgan reanimatsion choralarga qaramasdan, gipertoniya va arterial gipertenziya kabi hamroh kasalliklar fonida bemorning ahvoli keskin og‘irlashib, o‘tkir yurak-qon tomir va nafas yetishmovchiligining 4-darajasi hamda poliorgan yetishmovchiligidan vafot etdi.
SSV avvalgi vafot etgan bemorlar haqidagi o‘lim xabarlaridan farqli ravishda bu safar bemorning hayotdan ko‘z yumgan kuniga aniqlik kiritdi. Bemorning vafoti bir kundan keyin e’lon qilinmoqda. Vazirlik bungacha oxirgi marta 30-bemor vafot etganida uning o‘lim sanasi haqida ma’lumot bergandi.
49 yoshli erkak SSV tomonidan koronavirus asoratlaridan vafot etgani e’lon qilingan 81-bemor bo‘ldi. “Daryo” hisobi bo‘yicha koronavirus qurbonlari soni 83 nafarga yetdi. 15-iyul kuni Davlat xizmatlari agentligi matbuot xizmati agentlikning Navoiy viloyati boshqarmasining mas’ul xodimi 61 yoshli Adhamjon Dehqonovning koronavirus asoratlari oqibatida vafot etganini xabar qilgandi. Shuningdek, 18-iyul kuni Madaniyat vazirligi matbuot xizmati vazirlikning Iqtisodiy tahlil, moliya va buxgalteriya boshqarmasi bosh mutaxassisi lavozimida ishlagan 32 yoshli Akmal Irisov koronavirus asoratlari oqibatida vafoet etganini ma’lum qildi. Ushbu ikki o‘lim holati bo‘yicha hozircha Sog‘liqni saqlash vazirligi axborot bergani yo‘q.
Shuningdek, rejissor Sarvar Karimov 17-iyul kuni otasi koronavirus oqibatida vafot etgani, ammo unga tashxis qo‘yilmaganini ma’lum qilgan. Rejissorning otasi 63 yoshda bo‘lgan.
Izoh (0)