Соғлиқни сақлаш вазирлиги коронавирусга чалинган яна бир бемор ўткир юрак-қон томир ва нафас етишмовчилигидан вафот этганини хабар қилди.
Тошкент шаҳри Шайхонтоҳур туманида яшаган 49 ёшли А.А. исмли эркакда 14 июль куни COVID-19 тасдиқланган ва Вирусология илмий текшириш институти клиникасига ётқизилган.
Унга COVID-19 инфекциясининг ўта оғир кечиши, икки томонлама пневмония ташхиси қўйилган. Беморда гипертония, артериал гипертензия каби ҳамроҳ касалликлар ҳам аниқланган.
Беморга мутахассислар томонидан онлайн консултация ва консилиумлар ўтказилган, даволаш жараёни белгиланган стандартлар асосида олиб борилган.
17 июль куни мутахассислар томонидан тўлиқ ҳажмда, стандарт асосида ўтказилган реанимацион чораларга қарамасдан, гипертония ва артериал гипертензия каби ҳамроҳ касалликлар фонида беморнинг аҳволи кескин оғирлашиб, ўткир юрак-қон томир ва нафас етишмовчилигининг 4-даражаси ҳамда полиорган етишмовчилигидан вафот этди.
ССВ аввалги вафот этган беморлар ҳақидаги ўлим хабарларидан фарқли равишда бу сафар беморнинг ҳаётдан кўз юмган кунига аниқлик киритди. Беморнинг вафоти бир кундан кейин эълон қилинмоқда. Вазирлик бунгача охирги марта 30-бемор вафот этганида унинг ўлим санаси ҳақида маълумот берганди.
49 ёшли эркак ССВ томонидан коронавирус асоратларидан вафот этгани эълон қилинган 81-бемор бўлди. «Дарё» ҳисоби бўйича коронавирус қурбонлари сони 83 нафарга етди. 15 июль куни Давлат хизматлари агентлиги матбуот хизмати агентликнинг Навоий вилояти бошқармасининг масъул ходими 61 ёшли Адҳамжон Деҳқоновнинг коронавирус асоратлари оқибатида вафот этганини хабар қилганди. Шунингдек, 18 июль куни Маданият вазирлиги матбуот хизмати вазирликнинг Иқтисодий таҳлил, молия ва бухгалтерия бошқармаси бош мутахассиси лавозимида ишлаган 32 ёшли Акмал Ирисов коронавирус асоратлари оқибатида вафоэт этганини маълум қилди. Ушбу икки ўлим ҳолати бўйича ҳозирча Соғлиқни сақлаш вазирлиги ахборот бергани йўқ.
Шунингдек, режиссёр Сарвар Каримов 17 июль куни отаси коронавирус оқибатида вафот этгани, аммо унга ташхис қўйилмаганини маълум қилган. Режиссёрнинг отаси 63 ёшда бўлган.
Изоҳ (0)