Toshkent shahar hokimligi matbuot kotibi Furqat Mahmudxo‘jayev poytaxt tibbiyot muassasalariga 103 raqami orqali tez yordamga murojaat qilishda bandlik bo‘lmasligi choralari ko‘rilayotganini bildirdi. Bu haqda u AOKA huzuridagi shtabda tashkil etilgan brifingda ma’lum qilgan.
Jumladan, qo‘ng‘iroqlar intensivligi o‘rganilganda 103 raqamiga soat 18:00 dan soat 00:00 gacha eng ko‘p murojaatlar bo‘lishi aniqlangan. Shu munosabat bilan ish rejimi qayta ko‘rib chiqilib, ayni vaqt oralig‘ida eng tajribali operatorlar ishlashlari uchun tanlab olingan. Yaxshi ishlagan operatorlarni rag‘batlantirish tizimi yo‘lga qo‘yilgan.“Tez yordam brigadasi 15 daqiqadan ko‘p bo‘lmagan vaqtda yetib borishi choralari ko‘rildi. Yaxshi ishlagan brigadalar uchun ham rag‘batlantirish tizimi qo‘llaniladi”, — deydi Mahmudxo‘jayev.
Mavzuga doir: Toshkent shahar hokimligi koronavirusga qarshi kurash uchun o‘pkani sun’iy nafas oldirish apparatlari va Damas avtomobillari sotib oldi
Eslatib o‘tamiz, 15-iyul kuni Prezident Shavkat Mirziyoyev ishtirokida videoselektor bo‘lib o‘tdi. Selektor davomida koronavirus tarqalishining oldini olish va davolash bo‘yicha Toshkent shahridagi ishlarni talab darajasida tashkil etmagani, epidemiologik vaziyatning salbiy o‘zgarishlariga tayyor bo‘lishni ta’minlamagani, bu kasallik bilan “pastga tushib” mukammal shug‘ullanmagani uchun Toshkent shahri hokimi Jahongir Ortiqxo‘jayev va sog‘liqni saqlash vaziri Alisher Shodmonovga hayfsan e’lon qilingan.
Izoh (0)