Toshkent shahrida shakllantirilgan yangi koyka-o‘rinlar zaxirasi bo‘yicha ma’lumot berildi

Toshkent shahar hokimligi matbuot kotibi Furqat Mahmudxo‘jayev tuman hokimlari tomonidan 2358 ta koyka zaxirasi shakllantirilganini ma’lum qildi. Bu haqda u AOKA huzuridagi shtabda tashkil etilgan brifingda gapirib o‘tdi. Shaharda joylashgan barcha davlat tibbiyot muassasalari xatlovdan o‘tkazilgan.

Koykalar zaxirasi tumanlar kesimida quyidagicha ko‘rinish oldi:

• Bektemir tumani: 6-sonli shahar klinik shifoxonasida 110 ta koyka;
• Mirzo Ulug‘bek tumani: Respublika nogironlar reabilitatsiya markazida 130 ta koyka;
• Mirobod tumani: 3-sonli shahar klinik shifoxonasida 100 ta koyka hamda 1-Respublika klinik shifoxonasida 100 ta koyka;
• Olmazor tumani: 2-Tibbiyot akademiyasi (ToshMI-2)da 412 ta koyka;
• Uchtepa tumani: Jahon tillari universiteti yotoqxonasida 350 ta koyka;
• Chilonzor tumani: Toshkent viloyati Markaziy shifoxonasida 120 ta koyka;
• Yunusobod tumani: Nuroniylar sanatoriysida 300 ta koyka hamda Respublika ixtisoslashtirilgan terapiya va tibbiy reabilitatsiya ilmiy-amaliy tibbiyot markazida 400 ta koyka;
• Yashnobod tumani: Nuroniylar sanatoriysida 156 ta koyka, 4-sonli shahar klinik shifoxonasida 30 ta koyka, 2-yuqumli kasalliklar shifoxonasida 50 ta koyka va Respublika ixtisoslashtirilgan travmatologiya tibbiyot markazi 100 ta koyka mavjud.

“Bu yo‘nalishda ishlar davom etmoqda. Lekin bu muammolar hal etildi degani emas. Vaziyatdan eson-omon chiqib ketishimiz uchun hali ko‘p mehnat qilish zarur”, — deya qo‘shimcha qildi Mahmudxo‘jayev.

Eslatib o‘tamiz, 8-iyul kuni Koronavirusga qarshi kurash shtabi vakillari ishtirokida o‘tkazilgan brifing davomida professor Habibulla Oqilov koronavirus infeksiyasi belgisiz o‘tayotgan bemorlarning uy va mehmonxonada davolanishiga ruxsat berilgan bo‘lsa-da, O‘zbekistondagi statsionarlarda ko‘yka-o‘rinlar qolmaganini ma’lum qilgandi. Biroq 9-iyul kuni brifingda Oqilov pandemiyaning dastlabki kunlaridan hukumat o‘z vazifasini bajarib kelayotgani, koyka-o‘rinlar, dori vositalari zaxirasi mavjudligini bildirgan.

Prezident Shavkat Mirziyoyev 14-iyul kuni bo‘lib o‘tgan videoselektor yig‘ilishida mamlakatdagi epidemiologik vaziyatga yana bir bor alohida to‘xtalib, mamlakatda koronavirusga qarshi kurash uchun barcha zaxira va imkoniyatlar mavjudligini ma’lum qilgandi.