O‘zbekistonda koronavirus alomatlari sezilgan bemorlar test tahlili natijalarisiz ham tibbiyot muassasalariga joylashtiriladi

O‘zbekistonda endi bemor koronavirus alomatlari bilan murojaat qilganda, uni klinikaga yotqizish uchun test natijasi bo‘lishi shart emas. Bu haqda 18-iyul, shanba kuni AOKA huzuridagi shtabda o‘tkazilgan brifingda Koronavirusga qarshi kurashish shtabi a’zosi Feruza Hamroboyeva ma’lum qildi.

AOKA huzuridagi shtabga odamlarda koronavirusning ba’zi alomatlari sezilayotgan bo‘lsa ham, lekin hali test javobi chiqmagan bo‘lsa, shifoxonalar ularni qabul qilmayotgani haqida savol kelib tushgan. Feruza Hamroboyeva bu savolga javob berar ekan, hukumatning yig‘ilishi shtabida ushbu masala ko‘rib chiqilganini ma’lum qildi.

Unga ko‘ra, 18-iyuldan boshlab bemorlarni shifoxonalarga qabul qilish test sinovlari natijalarisiz ham amalga oshirilishi mumkin bo‘ldi.