Xakerlar Bill Geyts, Ilon Mask va Kanye Uestning Twitter akkauntlarini buzib kirib, bitkoin talab qildi

Xakerlar Microsoft asosichisi Bill Geyts, shuningdek, SpaceX asoschisi va Tesla bosh direktori Ilon Maskning Twitter’dagi akkаuntlarini buzib kirdi, deb xabar beradi Engadget.

Biznesmenlarning akkauntlari orqali bitkoinlarni ma’lum bir hamyonga o‘tkazish va kriptovalyutalarni ikki barobar qilib qaytarish to‘g‘risida tvitlar paydo bo‘lgan. Tez orada ushbu tvitlar o‘chirilgan, biroq keyinroq yana e’lon qilingan.

The Verge’ning yozishicha, foydalanuvchilar Mask va Geytsning tvitlarida ko‘rsatilgan bitkoin-hamyonlarga 50 ming dollar miqdorida kriptovalyuta o‘tkazishga ulgurgan.

Ma’lumotlarga ko‘ra, Geyts va Maskning akkauntlaridan tashqari, kriptovalyutalar nashri — CoinDesk, Binance kriptovalyuta birjasi va kriptovalyuta bozoriga taalluqli boshqa kompaniyalarning Twitter’dagi akkauntlari buzib kirilgan. Xakerlar buni qanday amalga oshirgani noma’lum.

So‘nggi xabarlarga ko‘ra, reper Kanye Uest, AQSh sobiq prezidenti Barak Obama, Amazon asoschisi Jeff Bezos, shuningdek, Apple va Uber’ning Twitter’dagi rasmiy akkauntlari ham xakerlar hujumiga uchragan.

Twitter mazkur muammodan xabardor ekanligi va uni bartaraf etish ustida ish boshlaganini ma’lum qilgan.