Хакерлар Microsoft асосичиси Билл Гейтс, шунингдек, SpaceX асосчиси ва Tesla бош директори Илон Маскнинг Twitter’даги аккаунтларини бузиб кирди, деб хабар беради Engadget.
Бизнесменларнинг аккаунтлари орқали биткоинларни маълум бир ҳамёнга ўтказиш ва криптовалюталарни икки баробар қилиб қайтариш тўғрисида твитлар пайдо бўлган. Тез орада ушбу твитлар ўчирилган, бироқ кейинроқ яна эълон қилинган.
The Verge’нинг ёзишича, фойдаланувчилар Маск ва Гейтснинг твитларида кўрсатилган биткоин-ҳамёнларга 50 минг доллар миқдорида криптовалюта ўтказишга улгурган.
Маълумотларга кўра, Гейтс ва Маскнинг аккаунтларидан ташқари, криптовалюталар нашри — CoinDesk, Binance криптовалюта биржаси ва криптовалюта бозорига тааллуқли бошқа компанияларнинг Twitter’даги аккаунтлари бузиб кирилган. Хакерлар буни қандай амалга оширгани номаълум.
Сўнгги хабарларга кўра, рэпер Канье Уэст, АҚШ собиқ президенти Барак Обама, Amazon асосчиси Жефф Безос, шунингдек, Apple ва Uber’нинг Twitter’даги расмий аккаунтлари ҳам хакерлар ҳужумига учраган.
Twitter мазкур муаммодан хабардор эканлиги ва уни бартараф этиш устида иш бошлаганини маълум қилган.
Изоҳ (0)