Hozirda ta’tilda bo‘lgan Turkmaniston prezidenti Gurbanguli Berdimuhamedov baliq oviga chiqib, qo‘lga kiritgan o‘ljalarini Kopetdag‘dagi Mehribonlik uyi tarbiyalanuvchilariga yubordi, deb xabar beradi “Altyn Asyr” kanali.
E’tiborli jihati, televideniye mamlakat prezidentini himoya niqobi va qo‘lqoplarda ko‘rsata boshlagan, hatto u tabiat qo‘ynida bo‘lganida ham. Turkmaniston hududida koronavirus tarqalganini rasman tan olmagan mamlakat Sog‘liqni saqlash vazirligi esa niqob havoda “zararli chang tarqalgani” sabab taqilayotganini ma’lum qilgan.
Berdimuhamedov ko‘l bo‘yiga qarmog‘ini qo‘yib, turkman yeri va mahalliy o‘simliklarining o‘ziga xosligi to‘g‘risida chop etilgan maqolalarni o‘qib chiqqan. Prezident o‘zining barcha harakatlarini — gazeta o‘qishdan tortib, binokolda atrofni kuzatishlarigacha — yolg‘iz bo‘lsa-da, niqobni yechmagan holda amalga oshirgan.
Telereportajda ma’lum qilinishicha, Berdimuhamedov ushlagan baliqlar bolalar uyining barcha tarbiyalanuvchilarini to‘ydirishga yetgan. Sayrga chiqqan bolalar ham niqobda ko‘rsatilgan, bino ichida esa — niqobsiz.
Eslatib o‘tamiz, mart oyida Turkmaniston hukumati “koronavirus” so‘zini ishlatish, shuningdek, fuqarolarga ko‘chaga tibbiy niqoblarni taqib chiqishni taqiqlagan edi.
Avvalroq Turkmaniston poytaxtida tibbiy niqoblar narxi bir haftada 14 baravar oshgani to‘g‘risida xabar berilgandi. Mamlakatda koronavirus bilan bog‘liq vaziyatni o‘rganish uchun 6-iyuldan buyon Jahon sog‘liqni saqlash tashkiloti missiyasi bo‘lib turibdi. U infeksiya tarqalishi xavfini baholash uchun Turkmaniston kasalxonalari va laboratoriyalariga tashrif buyurishi lozim. Mamlakatga mutaxassislarning kirib kelishi bilan deyarli bir vaqtda Turkmaniston prezidenti va hukumati ta’tilga chiqib ketgan.
Izoh (0)