Qozog‘iston Sog‘liqni saqlash vazirligi bosh travmatolog-ortopedi Nurlan Batpenov va Turkiston viloyati hokimining birinchi o‘rinbosari Kosman Aytmuhamedov koronavirusdan vafot etdi. Mansabdorlarning o‘limini Qozog‘iston Xavfsizlik kengashi kotibi Aset Isekeshev tasdiqlagan.
Isekeshev o‘zining Facebook’dagi sahifasida mazkur ikki hamkasbining koronavirusdan vafot etganini yozgan.
Nurlan Batpenov 71 yoshda bo‘lgan. U Travmatologiya va ortopediya ilmiy-tadqiqot institutining direktori, tibbiyot fanlari doktori va Qozog‘iston Milliy fanlar akademiyasining akademigi, Qozog‘iston Travmatologiya va ortopediya uyushmasining prezidenti bo‘lgan.
Kosman Aytmuhamedov 57 yoshida vafot etdi. 2019-yil fevral oyidan buyon u Turkiston viloyati hokimining birinchi o‘rinbosari lavozimida ishlab kelayotgandi. Undan avval u Aqmo‘la viloyati hokimi o‘rinbosari, Aqmo‘la viloyati hokimi, Qozog‘istonning mintaqaviy rivojlanish bo‘yicha vaziri o‘rinbosari, Milliy iqtisodiyot vazirligining Qurilish, uy-joy kommunal xizmat ko‘rsatish va yerdan foydalanish qo‘mitasi raisi o‘rinbosari, Ostona shahri hokimi lavozimlarida ishlagan.
Avvalroq Olmaota viloyat hokimi o‘rinbosari va Olmaota viloyati bosh sanitariya vrachi pnevmoniyadan vafot etgandi.
Eslatib o‘tamiz, Qozog‘iston prezidenti Qosim-Jo‘mart To‘qayev mamlakatda koronavirusning ikkinchi to‘lqini boshlanganini e’lon qilgan edi va bunda Sog‘liqni saqlash vazirligini ayblagandi. Qozog‘istonda karantin cheklovlari iyul oyining oxirigacha uzaytirildi.
Mavzuga doir: Qozog‘istonda koronavirusdan vafot etgan ikki shifokorga “Mehnat Qahramoni” unvoni berildi
Izoh (0)