Qozog‘istonda Olmaota viloyatining bosh sanitariya vrachi Qayrat Baymuhambetov vafot etdi. Bu haqdagi axborot viloyat hokimligi matbuot xizmati tomonidan tasdiqlandi, deya xabar bermoqda “Nur.kz”. “Liter.kz”ning hokimlikka asoslanib aniqlik kiritishicha, Baymuhambetov pnevmoniyadan vafot etgan, u vafotiga qadar “xasta holida shifoxonada yotgan”.

Foto: “Ratel.kz”

Qayd etishlaricha, 56 yoshli Baymuhambetov uzoq yillar davomida sanitariya-epidemiologiya sohasida mehnat qilgan, ushbu sohada turli rahbar lavozimlarda ishlagan. U 2019-yil may oyida Olmaota viloyati bosh sanitariya vrachi etib tayinlangan edi. Uning ayoli va uch bolasi qoldi.

Ma’lumot uchun, Qozog‘istonda so‘nggi bir sutka ichida koronavirus infeksiyasini yuqtirib olish bilan bog‘liq 1726 ta holat ro‘yxatga olingan. Ulardan 790 tasi simptomli, 936 tasi esa simptomsiz tashuvchilardir.

Umuman, hozirgacha mamlakatda 54 mingdan ortiq kasallanish holati aniqlangan, 31 mingdan ortiq kishi sog‘ayib ulgurgan; bemorlarning 280 nafari vafot etgan. Mamlakat prezidenti Qosim-Jo‘mart To‘qayev mamlakatda kasallikning ikkinchi to‘lqini boshlanganini ma’lum qilib, 13-iyulni koronavirus qurbonlari xotirasi uchun umummilliy motam kuni deb e’lon qildi.

Qozog‘iston Sog‘liqni saqlash vaziri Aleksey Soyning tan olishicha, koronavirus infeksiyasini yuqtirib olgan va undan vafot etganlar soni aslida ko‘proq bo‘lishi mumkin, boisi komissiya bu qadar ko‘p o‘lim holatlarini ko‘rib chiqishga ulgurmayapti, vazirlik oldiga esa mamlakatning barcha aholisini koronavirusga testdan o‘tkazish vazifasi qo‘yilmagan.