Қозоғистон Соғлиқни сақлаш вазирлиги бош травматолог-ортопеди Нурлан Батпенов ва Туркистон вилояти ҳокимининг биринчи ўринбосари Косман Айтмуҳамедов коронавирусдан вафот этди. Мансабдорларнинг ўлимини Қозоғистон Хавфсизлик кенгаши котиби Асет Исекешев тасдиқлаган.
Исекешев ўзининг Facebook’даги саҳифасида мазкур икки ҳамкасбининг коронавирусдан вафот этганини ёзган.
Нурлан Батпенов 71 ёшда бўлган. У Травматология ва ортопедия илмий-тадқиқот институтининг директори, тиббиёт фанлари доктори ва Қозоғистон Миллий фанлар академиясининг академиги, Қозоғистон Травматология ва ортопедия уюшмасининг президенти бўлган.
Косман Айтмуҳамедов 57 ёшида вафот этди. 2019 йил февраль ойидан буён у Туркистон вилояти ҳокимининг биринчи ўринбосари лавозимида ишлаб келаётганди. Ундан аввал у Ақмўла вилояти ҳокими ўринбосари, Ақмўла вилояти ҳокими, Қозоғистоннинг минтақавий ривожланиш бўйича вазири ўринбосари, Миллий иқтисодиёт вазирлигининг Қурилиш, уй-жой коммунал хизмат кўрсатиш ва ердан фойдаланиш қўмитаси раиси ўринбосари, Остона шаҳри ҳокими лавозимларида ишлаган.
Аввалроқ Олмаота вилоят ҳокими ўринбосари ва Олмаота вилояти бош санитария врачи пневмониядан вафот этганди.
Эслатиб ўтамиз, Қозоғистон президенти Қосим-Жўмарт Тўқаев мамлакатда коронавируснинг иккинчи тўлқини бошланганини эълон қилган эди ва бунда Соғлиқни сақлаш вазирлигини айблаганди. Қозоғистонда карантин чекловлари июль ойининг охиригача узайтирилди.
Мавзуга доир: Қозоғистонда коронавирусдан вафот этган икки шифокорга «Меҳнат Қаҳрамони» унвони берилди
Изоҳ (0)