“Qo‘qon-1912” klubi bosh murabbiyi Baxtiyor Ashurmatov Coca-Cola Superliga 9-turi doirasida “Nasaf”ga qarshi kechgan o‘yindan (2:2) so‘ng o‘z fikrlarini bildirdi.
“His-hayajonlarga to‘la, asablarni tarang qiladigan og‘ir o‘yin bo‘ldi. Ro‘ziqul Berdiyev ajoyib, tezkor va agressiv jamoa tuzgan. O‘zbekistonda bunchalik tezkor futbolchilarga ega jamoa yo‘q. “Nasaf” qarshi hujumlarda ajoyib o‘yin ko‘rsatadi. Ularni o‘yinini o‘rganib chiqib, ikkita hujumchi bilan emas, bitta hujumchi bilan maydonga tushdik. Qaysidir vaziyatlarda bu o‘zini oqladi. Yigitlarga minnatdorchilik bildirmoqchiman. Ikki bor hisobda orqada borayotib mag‘lubiyatdan qutulib qolishdi. Afsuski, oxirgi daqiqada yosh hujumchimiz Hamidullo Abduhamidov vaziyatni qo‘ldan chiqardi. Umuman olganda, taktik jihatdan yaxshi o‘yin bo‘ldi.
Bamba o‘tgan OKMK bilan o‘yinda zaxiradan tushib o‘yinimizni kuchaytirgan edi. Shuning uchun uni boshlang‘ich tarkibga kiritgan edim. Yakuba bu safar o‘z darajasidagi o‘yinni ko‘rsata olmadi. Ayrim vaziyatlarda to‘pni yo‘qotib qo‘ydi. Natijada “Nasaf”ni qarshi hujumlarini qo‘yib yubordik. O‘yinda dastlabki golni mehmonlar kiritgani uchun rejalarimizga o‘zgartirishlar kiritdik. Ikkinchi bo‘limda rejamiz bo‘yicha 15 daqiqalardan keyin Muzaffarovni tushirmoqchi edik.
Bizda ikki nafar teng kuchli darvozabon bor. Ularni sport formalarini birdek ushlab turish uchun ham har ikkalariga imkoniyat taqdim qilyapmiz. Ularni imkoniyati teng. Ikkala darvozabonga o‘yin amaliyoti berishga qaror qilyapmiz.
Tarkibimizda Rayevats, Yosovich kabi gavdali futbolchilarimiz bor. Shuningdek, jarima zarbalalarini mukammal amalga oshiradigan ijrochilarimiz yetarli. Bobur Akbarov “Bunyodkor” bilan o‘yinda avtogol urgandi. Bu o‘yinda gollari bilan muxlislar oldida yuzini yorug‘ qildi”, — deya Ashurmatovdan iqtibos keltirmoqda “Championat.asia”.
Ushbu natijadan so‘ng “Qo‘qon-1912” 16 ochko bilan 4-pog‘onada qoldi. Jamoa keyingi turda “Paxtakor”ni mehmon qiladi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)