«Қўқон-1912» клуби бош мураббийи Бахтиёр Ашурматов Coca-Cola Суперлига 9-тури доирасида «Насаф»га қарши кечган ўйиндан (2:2) сўнг ўз фикрларини билдирди.
«Ҳис-ҳаяжонларга тўла, асабларни таранг қиладиган оғир ўйин бўлди. Рўзиқул Бердиев ажойиб, тезкор ва агрессив жамоа тузган. Ўзбекистонда бунчалик тезкор футболчиларга эга жамоа йўқ. «Насаф» қарши ҳужумларда ажойиб ўйин кўрсатади. Уларни ўйинини ўрганиб чиқиб, иккита ҳужумчи билан эмас, битта ҳужумчи билан майдонга тушдик. Қайсидир вазиятларда бу ўзини оқлади. Йигитларга миннатдорчилик билдирмоқчиман. Икки бор ҳисобда орқада бораётиб мағлубиятдан қутулиб қолишди. Афсуски, охирги дақиқада ёш ҳужумчимиз Ҳамидулло Абдуҳамидов вазиятни қўлдан чиқарди. Умуман олганда, тактик жиҳатдан яхши ўйин бўлди.
Бамба ўтган ОКМК билан ўйинда захирадан тушиб ўйинимизни кучайтирган эди. Шунинг учун уни бошланғич таркибга киритган эдим. Якуба бу сафар ўз даражасидаги ўйинни кўрсата олмади. Айрим вазиятларда тўпни йўқотиб қўйди. Натижада «Насаф»ни қарши ҳужумларини қўйиб юбордик. Ўйинда дастлабки голни меҳмонлар киритгани учун режаларимизга ўзгартиришлар киритдик. Иккинчи бўлимда режамиз бўйича 15 дақиқалардан кейин Музаффаровни туширмоқчи эдик.
Бизда икки нафар тенг кучли дарвозабон бор. Уларни спорт формаларини бирдек ушлаб туриш учун ҳам ҳар иккаларига имконият тақдим қиляпмиз. Уларни имконияти тенг. Иккала дарвозабонга ўйин амалиёти беришга қарор қиляпмиз.
Таркибимизда Раевац, Йосович каби гавдали футболчиларимиз бор. Шунингдек, жарима зарбалаларини мукаммал амалга оширадиган ижрочиларимиз етарли. Бобур Акбаров «Бунёдкор» билан ўйинда автогол урганди. Бу ўйинда голлари билан мухлислар олдида юзини ёруғ қилди», — дея Ашурматовдан иқтибос келтирмоқда «Championat.asia».
Ушбу натижадан сўнг «Қўқон-1912» 16 очко билан 4-поғонада қолди. Жамоа кейинги турда «Пахтакор»ни меҳмон қилади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)