Kataloniyaning “Barselona” klubi koronavirus pandemiyasi oqibatlari tufayli 100 million yevro zarar ko‘rishi mumkin.
Mundo Deportivo xabariga ko‘ra, joriy moliyaviy yil uchun “Barselona”ning budjeti 1 milliard 47 million yevroni tashkil etgan. Koronavirus pandemiyasi boshlanishidan oldin esa katalon klubining 1,1 milliard yevro miqdorida daromad ko‘rishi kutilayotgandi.
Biroq pandemiya tufayli “Barselona”ning daromadi keskin pasayib ketdi: do‘konlar, muzeylar yopildi, stadion bo‘ylab sayohatlar to‘xtatildi. Ammo klubga eng katta zarar keltirgan jihat – jamoaning bo‘sh tribunalarda 6 ta uy uchrashuvini o‘tkazgani bo‘ldi.
Karantin vaqtida futbolchilarning oylik maoshining 12 foizga kamayishi zararlarni qoplashga oz bo‘lsa-da yordam berdi. Shu bilan birga “Barselona” Arturni “Yuventus”ga 80 million yevroga sotdi va Neymarning transferi bilan bog‘liq sud ishida g‘olib chiqdi. Bularning barchasi “Barselona”ga zararlarni 100 million yevrogacha kamaytirish imkonini beradi.
Eslatib o‘tamiz, avvalroq “Barselona” rahbariyati 200 million yevro foyda olishni rejalashtirayotgani to‘g‘risida xabarlar tarqalgandi.
36-turdan keyin “Barselona” 79 ochko bilan 2-o‘rinda bormoqda. Jamoa 1-pog‘onadagi “Real”dan 4 ochkoga ortda qolmoqda.
Mavzuga doir:
Izoh (0)