Ashxobodda 2021-yildan boshlab faqat oq rangli mashinalar harakatlanishi to‘g‘risidagi mish-mishlar sabab mamlakatdagi och kulrang va sarg‘ish rangli avtomobil egalari o‘z mashinalari sotmoqda, deb xabar beradi “Xronika Turkmenistana”.
Ma’lumotlarga ko‘ra, hozirda Turkmanistonda oq va yorqin kumush yoki sarg‘ish rangdan boshqa rangdagi avtomobillarni haydashga norasmiy taqiq o‘rnatilgan. Mahalliy aholi bu ranglarni “och rang” deb ataydi.
“Och rang”li avtomobillarning ayrim egalari qimmat bo‘lishiga qaramay, o‘z mashinalarini bo‘yashni boshlab yuborgan. Ayni vaqtda mashinani boshqa rangga bo‘yash 7-10 ming manat (290-420 dollar) turadi, yo‘ltanlamaslar va boshqa premium sinfga oid avtomobillar esa bundan ham qimmatroqqa tushadi.
Mamlakatdagi avtomobil egalarining so‘zlariga ko‘ra, agarda taqiq rasman joriy etilgudek bo‘lsa, bu kabi xizmatlar yanada qimmatlashib ketadi, bundan tashqari, odamlar ko‘payib ketishi bois bo‘yash jarayonlari ham ko‘p vaqt ola boshlaydi.
Haydovchilar nafaqat rangga qo‘yilgan taqiqdan, balki hukumat bu turdagi yangi qoidalar borasida oldindan ogohlantirilmagani va mashinani to‘satdan to‘xtatib, jarima maydonchasiga yuborishlari mumkinligidan g‘azabda.
Bunga qadar Turkmanistonda davlat tashkilotlarining 40 yoshdan oshgan xodimlariga sochini qoraga bo‘yash, kasalxonalarda shifokorlarga mobil telefonlardan foydalanish, davlat do‘konlarida sotuvchilarning bolalarga mahsulot sotishi taqiqlangan edi.
Izoh (0)