Rossiya prezidenti Vladimir Putin SSSR konstitutsiyasida ko‘zda tutilgan ittifoqchi davlatlarning yagona davlatdan ajralib chiqish huquqini “vaqti-soati kelib portlaydigan mina”ga qiyosladi. Bu haqda u “Rossiya” telekanaliga bergan intervyusida aytib o‘tgan, deb xabar bermoqda Meduza.
Putinning aytishicha, SSSR tuzilayotgan vaqtdayoq “ittifoqchi davlatlarning yagona davlatdan ajralib chiqish huquqi haqida Lenin tezisi mustahkamlangan bo‘lgan”. Stalin esa, Rossiya prezidentining ta’kidlashicha, boshqa fikrda bo‘lgan. U milliy birlashmalarning avtonom huquqda bo‘lishi tarafdori bo‘lgan, ya’ni milliy birlashmalar Rossiya tarkibiga avtonom hudud sifatida kirishi kerak bo‘lgan.
Natijada respublika SSSR tarkibidan qanday kelgan bo‘lsa, shunday chiqib ketishi mumkin edi. Amalda esa Sobiq ittifoq respublikalari mustaqil bo‘layotganda, tarixan Rossiya hududi bo‘lgan yerlarni olib ittifoq tarkibidan chiqib ketgan. Chunki Ittifoqdan chiqish huquqi bor, lekin bu jarayonning tartib-taomili belgilanmagan edi.
“SSSRga qo‘shilgan paytdagi yeri bilan ketsin edi, rus xalqidan sovg‘alarni o‘zi bilan olib ketmasin edi”, — deydi Putin.
Mavzuga doir: Putin SSSR respublikalariga “rus xalqi tomonidan berilgan sovg‘alarni” eslab o‘tdi (video)
Ma’lumot uchun, Rossiya konstitutsiyasiga tuzatishlar kiritish bo‘yicha taklif 2020-yil boshida Putinning o‘zi tomonidan taklif etilgandi. Tuzatishlar ro‘yxatiga keyinchalik Putinning prezidentlik muddatlarini nollashtirib, unga navbatdagi saylovlarda ham o‘z nomzodini qo‘yishga imkon beruvchi band ham qo‘shilgan.
Konstitutsiyasiga tuzatishlar kiritish bo‘yicha umumxalq referendumi 1-iyul kuni yakunlandi. Markaziy saylov komissiyasi ma’lumotlariga ko‘ra, saylovda ishtirok etganlarning 77,92 foizi tuzatishlarga rozilik bildirgan, 21,27 foizi qarshi chiqqan. Ovoz berishda davomat 67,97 foizni tashkil qilgan. Konstitutsiyaga tuzatishlar kiritish to‘g‘risidagi farmonini Putin 3-iyul kuni imzoladi.
Izoh (0)