Pokistonda fuqarolik aviatsiyasida faoliyat olib borayotgan uchuvchilarning 30 foizi parvozlarni amalga oshirishi uchun qalbaki litsenziya rasmiylashtirgan. Bu haqda mamlakat Aviatsiya vazirligi ma’lumotlariga tayanib CNN xabar qildi.
22-mayda sodir bo‘lgan Karachidagi Airbus 320 samolyoti halokatidan keyin 262 nafar bo‘lajak uchuvchining o‘rniga boshqalar imtihonlardan o‘tgani aniqlangan.
Associated Press agentligining qayd etishicha, Pakistan International Airlines (PIA) aviakompaniyasi ushbu voqeadan keyin 150 nafar uchuvchini ishdan chetlatgan.
PIA kompaniyasiga tegishli samolyot 22-may kuni qo‘nish vaqtida turar joy mavzesiga qulagan. Keyinchalik bu boradagi tergovning dastlabki natijalari e’lon qilingan. Dastlab samolyotning qo‘nish uchun qilgan birinchi urinishida dvigatel zarar ko‘rgani, dispetcherlar ekipajni bu haqda ogohlantirmagani oydinlashgan.
Ikkinchi urinishda uchuvchilar yetarli balandlikka ega emasligi haqida ogohlantirilgan, ammo ushbu xabarga javob qaytarmagan. Ekipaj a’zolari parvoz vaqtida koronavirus atrofidagi vaziyatlarni muhokama qilgan.
Izoh (0)