O‘zbekistonda aholi orasida koronavirus qayd etilishi holatlari mamlakat bo‘ylab barcha hududlarda kuzatilmoqda. 25-iyun kuni Jizzaxda ham ikki holatda aholi orasida kasallik qayd etildi. Ushbu viloyatda shu kunga qadar uch kishi koronavirusga chalingandi, ularning eng so‘nggisi 27-aprel kuni sog‘ayib, viloyat koronavirusdan xoli xududga aylangan edi, deb xabar bermoqda Sog‘liqni saqlash vazirligi.
Vazirlik tomonidan qayd etilishicha, 24-iyun kuni aholi orasida aniqlangan koronavirus bemorlarining 18 nafari Toshkent shahrida, 8 nafari Samarqand viloyatida, 5 nafari Toshkent viloyatida tasdiqlangan.
Toshkent viloyatida O‘rta Chirchiq tumanida yashovchi N.A.da koronavirus aniqlangan. U Toshkent shahar Yunusobod tumanidagi “Malika” maishiy texnika savdo majmuasiga borgan. Shuningdek, “Nazarbek” sanatoriysi xodimi X.A.da ham kasallik qayd etilgan. Vazirlikning bildirishicha, mazkur xodim 30-maydan 13-iyungacha karantinda bo‘lgan. Zangiota tumanida yashovchi M.D.da ham kasallanish tasdiqlangan. Qibray tumanida yashovchi S.I.da tana harorati ko‘tarilgani sababli tez tibbiy yordam chaqirgan va unda kasallik qayd etilgan.
Ma’lum qilinishicha, “O‘zmilliybank”ning Samarqand viloyati filiali xodimi Z.A.da, Kattaqo‘rg‘on tumanida yashovchi R.A.da ham koronavirus qayd etilgan. Kattaqo‘rg‘onlik fuqaro tana harorati ko‘tarilgani sababli yuqumli kasalliklar shifoxonasiga murojaat qilgan, shuningdek, uning 4 nafar qarindoshi hamda 2 nafar qo‘shnisida ham koronavirus aniqlangan.
Vazirlikning qayd etishicha, ayni paytda ushbu holatlar yuzasidan epidemiologik surishtiruv ishlari olib borilmoqda.
O‘zbekistonda 25-iyun soat 17:00 holatiga ko‘ra, yana 97 kishida koronavirus aniqlandi va mamlakatda kasallikka chalinganlar soni 7087 nafarga yetdi. Hozirgacha tuzalganlarning umumiy soni 4724 nafarga yetdi. Kasallik asoratlari oqibatida shu kunga qadar 20 kishi vafot etgan.
Izoh (0)