O‘zbekistonda 2021-yilning 1-yanvaridan tadbirkorlarga avtomobillarni texnik ko‘rikdan o‘tkazish xizmatini ko‘rsatishga ruxsat berilishi munosabati bilan mazkur xizmat turini taklif qilmoqchi bo‘lgan tadbirkorlarga belgilangan talablar ma’lum qilindi. Bu haqda 24-iyun kuni Toshkent shahrida tadbirkorlar va YPX xodimlari bilan birga bo‘lib o‘tgan yig‘ilishida so‘z bordi.
Eslatib o‘tamiz, Vazirlar Mahkamasining 2017-yil 22-dekabrdagi “Transport vositalarini majburiy texnik ko‘rikdan o‘tkazish tartibini takomillashtirish bo‘yicha qo‘shimcha chora-tadbirlar to‘g‘risida”gi 1010-sonli qarori bilan Ichki ishlar vazirligi Davlat yo‘l harakati xavfsizligi xizmati bo‘linmalarining jismoniy shaxslarga tegishli yengil avtotransport vositalarini majburiy texnik ko‘rikdan o‘tkazish bo‘yicha funksiyalarini 2019-yil 1-yanvardan boshlab yuridik shaxslar — tadbirkorlik subyektlariga o‘tkazish ko‘zda tutilgandi. Biroq Vazirlar Mahkamasining 2019-yil 15-fevraldagi 136-sonli qarori bilan mazkur muddat 2021-yil 1-yanvarga ko‘chirilgan.
Yig‘ilishda ma’lum qilinishicha, transport vositalarini majburiy texnik ko‘rikdan o‘tkazishda amalga oshirilayotgan ishlar va xizmatlarning xavfsizligi va sifatini ta’minlash maqsadida, transport vositalarining texnik holatini tekshirish uchun mo‘ljallangan ishlab chiqarish-texnik baza joylashtiriladigan xona va maydonlarga doir bir qancha talablar belgilangan.
Talablarda, texnik xizmat ko‘rsatish stansiyalari, tadbirkorlik subyektlari tomonidan transport vositalarining texnik holatini baholash uchun mo‘ljallangan ishlab chiqarish-texnik baza (laboratoriyalar) joylashtirilgan xona va maydonlarning texnik normalari belgilangan. Bunda 16 turdagi zarur texnik diagnostika vositalariga ega bo‘lishi lozim.
Ishlab chiqarish-texnik baza belgilangan tartibda akkreditatsiyadan o‘tkazilgan, transport vositalarining texnik holatini texnika jihatdan tartibga solish sohasidagi normativ hujjatlar talablarga muvofiqligini baholashni taklif etish va o‘tkazish uchun tegishli texnologik, sinov jihozlari va o‘lchash vositalari bilan ta’minlangan bo‘lishi kerak.
Qayd etilishicha, hozircha avtomobillarni diagnostika qilish stansiyalarida faqatgina M1 toifadagi transport vositalarini texnik ko‘rigini amalga oshirish mumkin.
Izoh (0)