O‘zbekistonda 24-iyun kuni 239 kishida koronavirus aniqlandi. Ulardan 31 nafari aholi orasida tasdiqlanib, shundan 18 nafari Toshkent shahrida qayd etilgan, deb xabar bermoqda Sog‘liqni saqlash vazirligi.
Ikki kunlik ma’lumotga ko‘ra, ham umumiy kasallanish ko‘rsatkichi, ham aholi orasida koronavirusga chalinish holati keskin ko‘paygan.
Jumladan, Toshkent shahri Uchtepa tumanida yashovchi X. Yu.da va shahar hokimligi obodonlashtirish muassasasi xodimi D.E.da koronavirus aniqlangan. Har ikki holatda ham fuqarolar shifoxonaga yotish uchun namuna topshirganda, ularda koronavirus borligi ma’lum bo‘lgan.
Mirzo Ulug‘bek tumanida yashovchi M.B.da “Ekobozor”ga borib kelgandan so‘ng tana harorati ko‘tarilgan va namuna topshirgan. Shundan so‘ng, mazkur fuqaro koronavirus yuqitirib olgani ma’lum bo‘lgan.
Olmazor tumanida yashovchi M.Q.da tana harorati ko‘tarilgani sababli namuna topshirgan va virus tasdiqlangan. Shu tumanda yashovchi M.X.da ham koronavirus aniqlangan. Mazkur tumanning yana bir fuqarosi, homilador S. F. tug‘ruqxonaga yotish uchun namuna topshirganda, unda koronavirus qayd etilgan.
Chilonzor tumanida yashab, Toshkent tumanidagi “Zangiota” bojxona postida faoliyat ko‘rsatuvchi Sh. S.da, shuningdek, “Comfort Leather” korxonasi xodimi va uning 5 nafar oila a’zosida ham koronavirus tasdiqlangan. Shu tumanida yashovchi D.S. qizi M.X.ning tana harorati ko‘tarilgani sababli tahlil topshirgan va natijasi ijobiy chiqqan.
Bundan tashqari, Sergeli tumanida yashovchi nafaqadagi fuqaro D.A. va uning turmush o‘rtog‘i A.A.da ham koronavirus bilan kasallanish aniqlangan. “O‘zagrotexsanoatxolding” AJ xodimi B.S. tana harorati ko‘tarilgani sababli tez tibbiy yordam chaqirgan va unda ham virus tasdiqlangan.
“Ayni paytda ushbu holatlar yuzasidan epidemiologik surishtiruv ishlari olib borilmoqda”, — deyiladi vazirlik xabarida.
Avvalroq 25-iyun soat 10:00 holatiga ko‘ra, Toshkentda aholi orasida yana 10 kishida koronavirus aniqlangani haqida xabar berilgandi.
Izoh (0)