O‘zbekistonda 23-iyun soat 23:00 dan 24-iyun soat 23:00 ga qadar koronavirus yuqtirib olish bilan bog‘liq 239 ta holat qayd etildi. Bu O‘zbekistonda shu kungacha bir kunda koronavirus aniqlanishi bo‘yicha rekord natijadir. Bungacha eng ko‘p kasallik aniqlangan kun 7-iyunga to‘g‘ri kelib, o‘shanda 237 kishida kasallik qayd etilgandi. Kun davomida qayd etilgan holatlardan so‘ng O‘zbekistonda koronavirusga chalinganlar soni 6901 nafarga yetdi.
Foto: Telegram / @ssvmatbuotkotibi
Yangi kasallanish holatlari
Yangi kasallanganlarning
- 207 nafari karantin muassasalarida;
- 31 nafari aholi orasida (Toshkent shahrida — 18 nafar, Samarqand viloyatida — 8 nafar, Toshkent viloyatida — 5 nafar);
- 1 nafari Toshkent viloyatida xalqaro yuk tashuvchi avtomashina haydovchilari orasida aniqlangan.
Kun davomida 4 ta hududda yangi kasallanganlar qayd etildi. Ushbu hududlarning 3 tasida aholi orasida koronavirus aniqlandi. Aholi orasida koronavirus aniqlanishi bir kun ichida bittaga ko‘paydi — 30 tadan 31 taga.
Toshkent shahrida kun davomida 69 kishida koronavirus aniqlangan bo‘lib, bulardan 51 nafari koronavirusga chalinganlar bilan muloqotda bo‘lib, karantinga olinganlar orasida, 18 nafari aholi orasida qayd etildi. Poytaxt kun davomida aholi orasida eng ko‘p koronavirusga chalinganlar aniqlanishi bo‘yicha oxirgi 10 kunda 8 marta yetakchi bo‘ldi. Iyun oyida Toshkent shahrida faqat 3-iyun kuni aholi orasida kasallik aniqlanmagan.
Toshkent viloyatida aniqlangan holatlarning 10 tasi koronavirusga chalinganlar bilan muloqotda bo‘lganlar orasida, 5 tasi aholi orasida, bittasi xalqaro yuk tashuvchi mashina haydovchilari orasida aniqlandi. Viloyatda 8 kundan beri aholi orasida, 11 kundan beri xalqaro yuk tashuvchi mashinalar haydovchilari orasida uzluksiz ravishda kasallik aniqlanmoqda.
Samarqand viloyatida koronavirusga chalinish bilan bog‘liq 14 ta holat qayd etildi. 22-may kuni Samarqandda 24 kishida koronavirus aniqlanganidan keyin kunlik kasallanganlar soni maksimum 11 nafarga yetayotgandi. 24-iyundagi kasallanish holatlarining 8 tasi esa aholi orasida, 6 tasi koronavirusga chalinganlar bilan muloqotda bo‘lib, karantinga olingan fuqarolar orasida aniqlandi. Samarqandda so‘nggi vaqtlarda, asosan, karantindagilar orasida kasallik aniqlanayotgandi. Oxirgi marta aholi orasida bu qadar ko‘p odamda kasallik aniqlanishi 30-mayda kuzatilgandi. O‘shanda ham aholi orasida 8 kishida kasallik qayd etilgan.
Navoiy viloyatida 11-iyun kuni aholi orasida 18 ta kasallanish holati qayd etilganidan so‘ng viloyatda aniqlanayotgan yangi holatlar koronavirusga chalinganlar bilan muloqotda bo‘lib, karantinga olinganlar orasida qayd etilmoqda. 24-iyunda qayd etilgan 5 ta holat ham karantindagilar orasida aniqlandi.
Kasallikdan davolanish
24-iyun davomida 125 nafar fuqaro sog‘aydi. Ulardan 116 nafari Toshkent shahri, 6 nafari Buxoro, 2 nafari Samarqand va 1 nafari Andijon viloyatlaridagi tibbiyot muassasalarida shifo topdi.
Hozirda kasallik qayd etilgan jami 6901 nafar bemordan 4685 nafari sog‘ayib, davolanish ko‘rsatkichi 68 foizni tashkil etmoqda. Davolanishning bu qadar past ko‘rsatkichi oxirgi marta 5-may kuni qayd etilgandi.
17-iyun kuni shifoxonalardagi bemorlar soni birinchi marta 1500 nafardan oshgandi, 23-iyunga kelib ularning soni 2000 nafardan ham oshdi. Ayni vaqtda shifoxonalardagi 2197 nafar bemordan 1760 nafari Toshkentdagi tibbiyot muassasalarida davolanmoqda (Sirdaryo viloyatidagi bemorlar ham Toshkent shahriga o‘tkazilgan). Qolgan 437 nafar bemor mamlakatning 9 hududidagi shifoxonalarda davolanmoqda.
Qoraqalpog‘istonda 7, Andijonda 13, Namanganda 28, Buxoroda 29, Surxondaryoda 30, Samarqandda 40, Xorazmda 56, Navoiyda 57 va Qashqadaryoda 177 nafar bemor qoldi. Jizzax va Farg‘ona viloyatlari koronavirusdan xoli hudud bo‘lib turibdi.
Ahvoli og‘ir bemorlar va o‘lim holatlari
Ayni paytda tibbiyot muassasalarida davolanayotgan 2197 nafar bemordan 14 nafari og‘ir, 5 nafari esa o‘ta og‘ir ahvolda. Bir sutka ichida ahvoli og‘ir bemorlar soni 3 nafarga kamaygan bo‘lsa, ahvoli o‘ta og‘ir bemorlar soni 1 nafarga ko‘paydi. 16-iyundan 19-iyungacha shifoxonalarda bironta ham ahvoli o‘ta og‘ir bemorlar qolmagandi. Endi esa ahvoli o‘ta og‘ir bemorlar soni iyun oyida eng katta ko‘rsatkichga chiqdi.
15-martda epidemiya boshlanganidan beri O‘zbekistonda 19 nafar bemor COVID-19 asoratlari oqibatida vafot etgan. 19-bemorning vafoti haqida 10-iyun kuni xabar berilgandi. Kitob va Denov tumanlari hokimliklari ham o‘z hududlarida koronavirus oqibatida bir nafardan bemor hayotdan ko‘z yumgani haqida xabar qilgan. Lekin Sog‘liqni saqlash vazirligi ushbu holatlarni tasdiqlamagan va qurbonlar soniga o‘zgartirish kiritmagan.
Karantindagilar
Hozirda O‘zbekistonda uy karantinida 37 173 nafar, statsionar karantinda esa 22 890 nafar fuqaro tibbiy kuzatuvda bo‘lib turibdi. Bir kun ichida uy karantinidagi fuqarolar soni 879 nafarga, statsionar karantindagi fuqarolar soni 234 nafarga ko‘paydi.
