Ўзбекистонда аҳоли орасида коронавирус қайд этилиши ҳолатлари мамлакат бўйлаб барча ҳудудларда кузатилмоқда. 25 июнь куни Жиззахда ҳам икки ҳолатда аҳоли орасида касаллик қайд этилди. Ушбу вилоятда шу кунга қадар уч киши коронавирусга чалинганди, уларнинг энг сўнггиси 27 апрель куни соғайиб, вилоят коронавирусдан холи худудга айланган эди, деб хабар бермоқда Соғлиқни сақлаш вазирлиги.
Вазирлик томонидан қайд этилишича, 24 июнь куни аҳоли орасида аниқланган коронавирус беморларининг 18 нафари Тошкент шаҳрида, 8 нафари Самарқанд вилоятида, 5 нафари Тошкент вилоятида тасдиқланган.
Тошкент вилоятида Ўрта Чирчиқ туманида яшовчи Н.А.да коронавирус аниқланган. У Тошкент шаҳар Юнусобод туманидаги «Малика» маиший техника савдо мажмуасига борган. Шунингдек, «Назарбек» санаторийси ходими Х.А.да ҳам касаллик қайд этилган. Вазирликнинг билдиришича, мазкур ходим 30 майдан 13 июнгача карантинда бўлган. Зангиота туманида яшовчи М.Д.да ҳам касалланиш тасдиқланган. Қибрай туманида яшовчи С.И.да тана ҳарорати кўтарилгани сабабли тез тиббий ёрдам чақирган ва унда касаллик қайд этилган.
Маълум қилинишича, «Ўзмиллийбанк»нинг Самарқанд вилояти филиали ходими З.А.да, Каттақўрғон туманида яшовчи Р.А.да ҳам коронавирус қайд этилган. Каттақўрғонлик фуқаро тана ҳарорати кўтарилгани сабабли юқумли касалликлар шифохонасига мурожаат қилган, шунингдек, унинг 4 нафар қариндоши ҳамда 2 нафар қўшнисида ҳам коронавирус аниқланган.
Вазирликнинг қайд этишича, айни пайтда ушбу ҳолатлар юзасидан эпидемиологик суриштирув ишлари олиб борилмоқда.
Ўзбекистонда 25 июнь соат 17:00 ҳолатига кўра, яна 97 кишида коронавирус аниқланди ва мамлакатда касалликка чалинганлар сони 7087 нафарга етди. Ҳозиргача тузалганларнинг умумий сони 4724 нафарга етди. Касаллик асоратлари оқибатида шу кунга қадар 20 киши вафот этган.
Изоҳ (0)