Shvetsiyaning IKEA supermarketlar tarmog‘i to‘qqizta mamlakat hukumatlari bilan ularning budjetidan pandemiya vaqtida yordam sifatida ajratilgan pullarni qaytarish masalasida muzokaralarni boshladi. Bu haqda “RBK” xabar berdi.
Kompaniyaning ko‘p sonli do‘konlarini nazorat qiluvchi Ingka Group’ning chakana operatsiyalar bo‘yicha menejeri Tolga Oknuning ma’lum qilishicha, ajratilgan mablag‘larni qaytarish bo‘yicha muzokaralar Belgiya, Xorvatiya, Chexiya, Irlandiya, Portugaliya, Ruminiya, Serbiya, Ispaniya va AQSh hukumatlari bilan olib borilmoqda.
Oknuning aytishicha, kompaniya dastlab savdolar 70-80 foizga pasayib ketishini taxmin qilgandi, biroq bu pasayish yuz bermadi. Tarmoqning deyarli barcha do‘konlari ochildi va odamlarning uy uchun mahsulotlar sotib olishga intilishi tufayli daromad olishni boshladi.
“Hozir eng to‘g‘ri ish bizni qo‘llab-quvvatlaganlarga rahmat aytish bo‘ladi. Siz bizni juda qiyin davrda qo‘llab-quvvatladingiz va biz ham sizga minnatdorchilik bildirishga tayyormiz”, — dedi u.
Oknuning qayd etishicha, fevral oyida kompaniya ko‘plab do‘konlarini yopishga majbur bo‘lgan, pullar esa xodimlarning ish haqini to‘lash uchun kerak bo‘lgan. Uning so‘zlariga ko‘ra, inqiroz fevral oyida taxmin qilinganidek jiddiy bo‘lmagan. Oknu jami qancha pul qaytarilishini ma’lum qilmagan.
Avvalroq IKEA kompaniyasi rahbari karantindan keyin tug‘ilish ko‘payishini taxmin qilgandi.
Izoh (0)