Buyuk Britaniya o‘z o‘tmishini qaytadan yozmasligi va tarixini buzmasligi lozim. Bu haqda mamlakat bosh vaziri Boris Jonson 14-iyun kuni chop etilgan Telegraph gazetasidagi maqolasida ta’kidladi. Shunday yo‘l bilan u Uinston Cherchill haykalini olib tashlashni talab qilgan irqchilikka qarshi o‘tkazilayotgan norozilik namoyishlarining chaqirig‘iga javob qaytardi.
Uning so‘zlariga ko‘ra, Britaniya tarixi juda murakkab bo‘lib, ayni paytda mamlakatdagi turli qarashlar va g‘oyalar uyg‘unlashgan. “Ha, Cherchill o‘zining uzoq yillik faoliyati davomida turli xil siyosiy qarashlar tarafdori bo‘lgan. Umuman olganda esa u vaqt o‘tishi bilan o‘zgargan”, — deb qo‘shimcha qilgan bosh vazir.
Jonson irqchilik ramzlari va tarixni o‘zgartirib ko‘rsatish bilan emas, muammoning o‘zi bilan kurashish lozimligini ta’kidladi. Shu munosabat bilan bosh vazir hayotning turli sohalaridagi tengsizlikning barcha jihatlarini ko‘rib chiqadigan hukumatlararo komissiya tuzilganligini e’lon qildi.
“Kelinglar, irqchilikka qarshi kurashaylik, lekin meroslarimizni tinch qo‘yaylik. Mamlakatda, darvoqe, Uinston Cherchill sharofati bilan joriy etilgan demokratik vositalar ham bor”, — deya so‘zlarini yakunlagan u.
Eslatib o‘tamiz, irqchilikka qarshi norozilik namoyishlari AQShda afroamerikalik Jorj Floydning Minneapolisda qo‘lga olinishi paytida vafot etganidan keyin boshlandi. Vaqt o‘tishi bilan bu harakatlar Yevropa mamlakatlarida, jumladan, Buyuk Britaniyada ham boshlandi. Ko‘p hollarda norozilik namoyishlari bosqinchilik va politsiya bilan to‘qnashuvlar bilan yakunlanmoqda.
Izoh (0)