Yevropa Ittifoqi tomonidan moliyalashtirilayotgan Agrocomp loyihasi Formaper – Milan-Montsa-Briantsa-Lodi (Italiya) savdo-sanoat, hunarmandlik, va qishloq xo‘jaligi palatasi, O‘zbekiston savdo-sanoat palatasi, Qozog‘iston respublikasi (Olmaota) “Savdo va sanoat korxonalari assotsiatsiyasi” YuSHU, Qarag‘anda viloyati savdo palatasi (Qarag‘anda), Jambil viloyatining ishbilarmon ayollar assotsiatsiyasi (Taraz), va Innovhub ESI — Milan-Montsa-Briantsa-Lodi (Italiya) savdo-sanoat, hunarmandlik va qishloq xo‘jaligi palatasi konsorsiumi tomonidan amalga oshirilmoqda.
Loyiha 2017-yilda boshlangan bo‘lib, yurtimizda loyihaning pilot hududlari sifatida Toshkent shahri, Toshkent va Namangan viloyatlari hamda Qoraqalpog‘iston Respublikasidan saralab olingan malakali mutaxassislar O‘zbekiston va Italiya mamlakatlari hududida maxsus “study visit”, “twinning” va “internship” dasturlari asosida 2 bosqichda tashkil etilgan seminar va amaliyot mashg‘ulotlarida olingan tajribaga ko‘ra agrosanoatning zamonaviy trendlarini O‘zbekistonga tatbiq qilishmoqda. Loyihaning so‘nggi bosqichida, mahalliy va xalqaro biznes-murabbiylar, mutaxassislar va tadbirkorlar tomonidan bepul vebinarlar (onlayn-darslar) o‘tkaziladi. Vebinar spikerlari orasida marketing, agrosanoat, servis sohalarida faoliyat olib boruvchi, ko‘p yillik tajribaga ega mutaxassislar bo‘lib, ular vebinarlar davomida tinglovchilar bilan to‘g‘ridan to‘g‘ri muloqot qiladi hamda ularning savollariga javob beradi.
Agrocomp loyihasi O‘zbekistonning eng muhim sohalaridan biri bo‘lgan agrosanoatga alohida urg‘u beradi. Ushbu loyiha doirasida, yurtimizning yuzlab fermerlik xo‘jaliklariga yuridik konsultatsiyalar berilib, ularni biznes rejalarni ishlab chiqishda qo‘llab-quvvatlash orqali kreditlash jarayoniga tayyorlash ko‘zda tutilgan.
Shu bilan birga, loyiha ayollar tadbirkorligiga ham alohida e‘tibor beradi. Loyiha doirasida O‘zbekistonning qishloq xo‘jaliklarida yashovchi kamida 100 nafar ayolga bepul biznes-treninglar, yuridik va psixologik ko‘mak taqdim qilinadi, hamda ularning ilk bizneslarini ochishga yaqindan yordam beriladi.
O‘zbekiston savdo sanoat palatasi raisi Adham Ikramovning so‘zlariga ko‘ra “Loyihadan ko‘zda tutilgan asosiy maqsad — Yevropa Ittifoqining oziq-ovqat sanoati va agrobiznes sohasida faoliyat yuritayotgan yetakchi korxonalari tomonidan foydalanilayotgan ilg‘or tajribalarni o‘rganish va tatbiq qilish orqali mahalliy oziq-ovqat mahsulotlarini ishlab chiqarish va qayta ishlashda qishloq xo‘jaligi korxonalarini samarali qo‘llab-quvvatlash, hamda ularni sifat jihatdan yangi raqobatbardoshlik darajasiga olib chiqish maqsadida professional mutaxassislar tarmog‘ini yaratish va mustahkamlashdan iborat”.
“Agrocomp loyihasi yurtimizdagi biznesni, ayniqsa agrosanoat sohasidagi tadbirkorlikni yuqori darajaga olib chiqib, mahalliy bizneslarni raqobatbardosh qiluvchi samarali loyihadir. Uning ichida bepul, barcha uchun ochiq bo‘lgan onlayn vebinarlar mavjudligi esa, yoshlarimizga va barcha biznes ixlosmandlariga foydali bo‘lishiga ishonamiz” – deydi Agrocomp loyihasi boshqaruvchisi Farruh Omonov.
Agrocomp vebinarlarida qanday qatnashish mumkin?
Loyiha vebinarlari to‘liq onlayn tarzda deyarli har kuni o‘tkaziladi. Ularda qatnashish uchun, O‘zbekiston savdo sanoat palatasining Telegram kanaliga obuna bo‘lishingiz, hamda vebinardan oldin e‘lon qilinadigan maxsus havolani kutishingiz kerak.
Hozirda Agrocomp marketing, sotuvlar, agrosanoat yangiliklari va biznesdagi eng muhim lahzalar haqidagi darslarini o‘tkazib ulgurdi, ammo oldinda yana ikki oylik vebinarlar sizni kutmoqda.
Reklama huquqi asosida.
Izoh (0)