Европа Иттифоқи томонидан молиялаштирилаётган Агроcомп лойиҳаси Формапер – Милан-Монца-Брианца-Лоди (Италия) савдо-саноат, ҳунармандлик, ва қишлоқ хўжалиги палатаси, Ўзбекистон савдо-саноат палатаси, Қозоғистон республикаси (Олмаота) «Савдо ва саноат корхоналари ассоциацияси» ЮШУ, Қарағанда вилояти савдо палатаси (Қарағанда), Жамбил вилоятининг ишбилармон аёллар ассоциацияси (Тараз), ва Инновҳуб ЭСИ — Милан-Монца-Брианца-Лоди (Италия) савдо-саноат, ҳунармандлик ва қишлоқ хўжалиги палатаси консорсиуми томонидан амалга оширилмоқда.
Лойиҳа 2017 йилда бошланган бўлиб, юртимизда лойиҳанинг пилот ҳудудлари сифатида Тошкент шаҳри, Тошкент ва Наманган вилоятлари ҳамда Қорақалпоғистон Республикасидан саралаб олинган малакали мутахассислар Ўзбекистон ва Италия мамлакатлари ҳудудида махсус «study visit», «twinning» ва «internship» дастурлари асосида 2 босқичда ташкил этилган семинар ва амалиёт машғулотларида олинган тажрибага кўра агросаноатнинг замонавий трендларини Ўзбекистонга татбиқ қилишмоқда. Лойиҳанинг сўнгги босқичида, маҳаллий ва халқаро бизнес-мураббийлар, мутахассислар ва тадбиркорлар томонидан бепул вебинарлар (онлайн-дарслар) ўтказилади. Вебинар спикерлари орасида маркетинг, агросаноат, сервис соҳаларида фаолият олиб борувчи, кўп йиллик тажрибага эга мутахассислар бўлиб, улар вебинарлар давомида тингловчилар билан тўғридан-тўғри мулоқот қилади ҳамда уларнинг саволларига жавоб беради.
Агроcомп лойиҳаси Ўзбекистоннинг энг муҳим соҳаларидан бири бўлган агросаноатга алоҳида урғу беради. Ушбу лойиҳа доирасида, юртимизнинг юзлаб фермерлик хўжаликларига юридик консултациялар берилиб, уларни бизнес режаларни ишлаб чиқишда қўллаб-қувватлаш орқали кредитлаш жараёнига тайёрлаш кўзда тутилган.
Шу билан бирга, лойиҳа аёллар тадбиркорлигига ҳам алоҳида эътибор беради. Лойиҳа доирасида Ўзбекистоннинг қишлоқ хўжаликларида яшовчи камида 100 нафар аёлга бепул бизнес-тренинглар, юридик ва психологик кўмак тақдим қилинади, ҳамда уларнинг илк бизнесларини очишга яқиндан ёрдам берилади.
Ўзбекистон савдо саноат палатаси раиси Адҳам Икрамовнинг сўзларига кўра «Лойиҳадан кўзда тутилган асосий мақсад — Европа Иттифоқининг озиқ-овқат саноати ва агробизнес соҳасида фаолият юритаётган етакчи корхоналари томонидан фойдаланилаётган илғор тажрибаларни ўрганиш ва татбиқ қилиш орқали маҳаллий озиқ-овқат маҳсулотларини ишлаб чиқариш ва қайта ишлашда қишлоқ хўжалиги корхоналарини самарали қўллаб-қувватлаш, ҳамда уларни сифат жиҳатдан янги рақобатбардошлик даражасига олиб чиқиш мақсадида профессионал мутахассислар тармоғини яратиш ва мустаҳкамлашдан иборат».
«Агроcомп лойиҳаси юртимиздаги бизнесни, айниқса агросаноат соҳасидаги тадбиркорликни юқори даражага олиб чиқиб, маҳаллий бизнесларни рақобатбардош қилувчи самарали лойиҳадир. Унинг ичида бепул, барча учун очиқ бўлган онлайн вебинарлар мавжудлиги эса, ёшларимизга ва барча бизнес ихлосмандларига фойдали бўлишига ишонамиз» – дейди Агроcомп лойиҳаси бошқарувчиси Фарруҳ Омонов.
Агроcомп вебинарларида қандай қатнашиш мумкин?
Лойиҳа вебинарлари тўлиқ онлайн тарзда деярли ҳар куни ўтказилади. Уларда қатнашиш учун, Ўзбекистон савдо саноат палатасининг Telegram каналига обуна бўлишингиз, ҳамда вебинардан олдин эълон қилинадиган махсус ҳаволани кутишингиз керак.
Ҳозирда Агроcомп маркетинг, сотувлар, агросаноат янгиликлари ва бизнесдаги энг муҳим лаҳзалар ҳақидаги дарсларини ўтказиб улгурди, аммо олдинда яна икки ойлик вебинарлар сизни кутмоқда.
Реклама ҳуқуқи асосида.
Изоҳ (0)