O‘zbekistonda barcha toifadagi davlat xizmatchilarining daromadlarini deklaratsiya qilish bo‘yicha qonun loyihasi ishlab chiqiladi. Bu haqda 11-iyun kuni Adliya vazirligida “Davlat fuqarolik xizmati to‘g‘risida”gi qonun loyihasiga bag‘ishlab o‘tkazilgan matbuot anjumanida ma’lum qilindi.
Qayd etilishicha, qonun loyihasida davlat xizmatchilarining qandaydir toifalarini o‘z daromadi va mulkini majburiy ravishda deklaratsiya qilish tizimidan mustasno qiluvchi normalar mavjud emas. Loyihaning 3-moddasida ba’zi mansabdor shaxslar fuqarolik xizmatchilariga emas, siyosiy xizmatchilar toifasiga kiritilishi faqatgina uning qo‘llanish sohasini belgilab beradi. Biroq bu mansabdor shaxslarni ma’lum bir toifasini majburiy deklaratsiya tizimi yoki davlat xizmatining boshqa umumiy tamoyillaridan chiqarib tashlanishidan dalolat bermaydi.
Mavzuga doir: Yangi qonun loyihasi nega ayrim mansabdorlarga tatbiq qilinmaydi? Adliya vazirligi izoh berdi
Ta’kidlanishicha, dunyo tajribasi davlat xizmatchilari daromadi va mulkini deklaratsiya qilish bilan bog‘liq masalalar alohida qonunchilik hujjatlari yoki korrupsiyaga qarshi kurash bilan bog‘liq hujjatlar bilan tartibga solinishini ko‘rsatmoqda. Prezidentning 2019-yil 3-oktabrdagi “O‘zbekiston Respublikasida kadrlar siyosati va davlat fuqarolik xizmati tizimini tubdan takomillashtirish chora-tadbirlari to‘g‘risida”gi farmoniga muvofiq davlat xizmatchilari tomonidan o‘z daromad va mulkini majburiy ravishda deklaratsiya qilish tizimini izchil joriy etish bo‘yicha me’yoriy-huquqiy hujjatlar tayyorlanmoqda.
Mavzuga doir: Adliya vaziri o‘rinbosari: Davlat xizmatini tartibga solish bo‘yicha qonun qabul qilishga siyosiy iroda yo‘q edi
Shuningdek, mansabdor shaxslar va ularning oila a’zolari tomonidan xorijiy davlatlar banklarida hisob raqami ochish, xorijda qimmatbaho buyumlar saqlash va ko‘chmas mulkka egalik qilish huquqi bilan bog‘liq masalalar qo‘shimcha ravishda o‘rganilishi qayd etildi.
Izoh (0)