O‘zbekiston aeroportlari mehmonlar tashrifiga qizg‘in tayyorgarlikni boshlab yuborgan. Bu haqda Uzbekistan Airports axborot xizmati xabar qilgan.
20 dan ziyod xorijiy aviakompaniyalar, jumladan, Turkish Airlines, Fly Dubai, Korean Air, Asiana, Air Astana, “Aeroflot”, “Sibir” vakillari hamda “O‘zaviatsiya” agentligi mutasaddilari o‘rtasida muloqot bo‘lib o‘tgan.
Muzokaralarda koronavirus pandemiyasi va karantin cheklovlarining yumshatilishidan keyin xorijiy aviakompaniyalarning o‘zaro parvozlarni qayta tiklashi va bu boradagi hamkorlikni samarali yo‘lga qo‘yishi masalalari haqida fikr almashilgan.Uzbekistan Airports boshqaruvi raisi Ravshan Ismoilov O‘zbekiston aeroportlari aviatashuvlarni tiklash, yo‘lovchilarga sifatli xizmat ko‘rsatish va hamkorlikda faoliyat olib borishdan manfaatdorligini qayd etgan. Shuningdek, u bu boradagi hamkorlikning sayyohlik hamda eksportning rivojlanishiga, investitsiyalar jalb qilinishi kuchayishiga turtki berishini ta’kidlagan.
Uzbekistan Airports matbuot xizmati xorijlik sheriklar ham O‘zbekistonga parvozlarni qayta tiklashga har jihatdan tayyor ekanligini ma’lum qilgan.
Eslatib o‘tamiz, 2020-yil 16-mart kuni Uzbekistan Airways mahalliy va xalqaro aviaqatnovlarni bekor qilgan, keyinchalik bekor qilingan reyslar uchun chiptalarni topshirishda jarimalar va sanksiyalar bo‘lmasligini bildirgan. 2-mayda Uzbekistan Airways ijroiya organiga O‘zbekiston tashqi iqtisodiy faoliyat milliy bankidan olingan 111 million AQSh dollari miqdoridagi kredit to‘lovini 2020-yilda vaqtincha to‘xtatib turish masalasini ko‘rib chiqish topshirilgan. Qaror yagona aksioner — davlat tomonidan 30-aprelda qabul qilingani haqida xabar berilgan. Karantin choralarini yengillashtirish doirasida 18-maydan boshlab O‘zbekistonning bir qator shaharlariga avia va temiryo‘l qatnovlari qayta tiklandi.O‘zbekiston Prezidenti Shavkat Mirziyoyev 2020-yil 25-may kuni transport sohasining barqaror ishlashini ta’minlash va izchil rivojlantirish masalalari bo‘yicha o‘tkazgan yig‘ilishida karantindan eng ko‘p zarar ko‘radigan Uzbekistan Airways va Uzbekistan Airports aksiyadorlik jamiyatlarining 122 million dollar kreditlari to‘lov muddatlari uzaytirilgani, 60 milliard so‘mlik soliq imtiyozlari taqdim etilgani, inqirozga qarshi kurashish jamg‘armasidan 50 million dollar miqdorida aylanma mablag‘ sifatida foizsiz ssudalar ajratilgani ma’lum qilindi. Shuningdek, O‘zbekistondagi 4 ta aeroportni davlat-xususiy sheriklikka, Uzbekistan Airways’ni xorijiy kompaniya boshqaruviga berish rejalashtirilgani aytildi.
28-mayda Uzbekistan Airways kompaniyasi “Mi-8MTV-1” rusumli ikkita vertolyotni, “TV3-117 VM” rusumli sakkizta va “VSU AI-9V” rusumli uchta aviatsion dvigatelni sotuvga qo‘ygani xabar qilingan edi.
Izoh (0)