Iqtisodiyot va tinchlik instituti dunyoning 99,7 foiz aholisi istiqomat qiladigan 163 mamlakatni qamrab olgan navbatdagi “Tinchliksevarlik global indeksi”ni (Global Peace Index 2020) e’lon qildi.
O‘zbekiston jamiyatning jipslashuvi, inson huquqlariga rioya etilishi, siyosiy va iqtisodiy barqarorlik, terrorchilik tahdidi, jangovar harakatlardagi ishtirok kabi omillar hisobga olinadigan mazkur reytingda 103-o‘rinni egalladi. O‘tgan yilgi reytingda mamlakat 102-o‘rinni egallagandi.
Markaziy Osiyo davlatlaridan Qozog‘iston 70, Qirg‘iziston 93, Tojikiston 107, Turkmaniston 116-o‘rinda qayd etildi. Mo‘g‘uliston 39-pog‘onadan joy olgan. Afg‘oniston 163 mamlakat orasida so‘nggi o‘rinni egalladi.
Islandiya ushbu reytingda 2008-yildan beri egallab kelayotgan yetakchilik o‘rnini bu gal ham hech kimga bermadi. Undan keyingi o‘rinlardan Yangi Zelandiya, Portugaliya, Avstriya va Daniya joy oldi.
“Tinchliksevarlik global indeksi” (GPI) Iqtisodiyot va tinchlik instituti tomonidan 14 yildan beri tuzib kelinadi. Indeks asosan uch toifaga quriladi: “Cho‘zilib ketgan nizolar”, “Muhofaza va xavfsizlik” hamda “Harbiylashish”. Bular ham o‘z navbatida 23 indikatorga bo‘linib, mamlakatlarning tashqi va ichki tinchliksevarligi baholanadi.
Indikatorlar, xususan, jamiyatning jinoyatlarga munosabati, har 100 ming aholiga to‘g‘ri keluvchi qotilliklar va mahkumlar soni, quroldan foydalanish imkoniyati, har 100 ming aholiga to‘g‘ri keluvchi politsiya va xavfsizlik xizmati xodimlari soni, qurolli nizolardagi ishtiroklar va qurbonlar soni, harbiy xarajatlar, siyosiy barqarorlik, ichki nizolarning davomiyligi va hokazolarni o‘z ichiga oladi.
Izoh (0)