Ўзбекистонда барча тоифадаги давлат хизматчиларининг даромадларини декларация қилиш бўйича қонун лойиҳаси ишлаб чиқилади. Бу ҳақда 11 июнь куни Адлия вазирлигида «Давлат фуқаролик хизмати тўғрисида»ги қонун лойиҳасига бағишлаб ўтказилган матбуот анжуманида маълум қилинди.
Қайд этилишича, қонун лойиҳасида давлат хизматчиларининг қандайдир тоифаларини ўз даромади ва мулкини мажбурий равишда декларация қилиш тизимидан мустасно қилувчи нормалар мавжуд эмас. Лойиҳанинг 3-моддасида баъзи мансабдор шахслар фуқаролик хизматчиларига эмас, сиёсий хизматчилар тоифасига киритилиши фақатгина унинг қўлланиш соҳасини белгилаб беради. Бироқ бу мансабдор шахсларни маълум бир тоифасини мажбурий декларация тизими ёки давлат хизматининг бошқа умумий тамойилларидан чиқариб ташланишидан далолат бермайди.
Мавзуга доир: Янги қонун лойиҳаси нега айрим мансабдорларга татбиқ қилинмайди? Адлия вазирлиги изоҳ берди
Таъкидланишича, дунё тажрибаси давлат хизматчилари даромади ва мулкини декларация қилиш билан боғлиқ масалалар алоҳида қонунчилик ҳужжатлари ёки коррупцияга қарши кураш билан боғлиқ ҳужжатлар билан тартибга солинишини кўрсатмоқда. Президентнинг 2019 йил 3 октябрдаги «Ўзбекистон Республикасида кадрлар сиёсати ва давлат фуқаролик хизмати тизимини тубдан такомиллаштириш чора-тадбирлари тўғрисида»ги фармонига мувофиқ давлат хизматчилари томонидан ўз даромад ва мулкини мажбурий равишда декларация қилиш тизимини изчил жорий этиш бўйича меъёрий-ҳуқуқий ҳужжатлар тайёрланмоқда.
Мавзуга доир: Адлия вазири ўринбосари: Давлат хизматини тартибга солиш бўйича қонун қабул қилишга сиёсий ирода йўқ эди
Шунингдек, мансабдор шахслар ва уларнинг оила аъзолари томонидан хорижий давлатлар банкларида ҳисоб рақами очиш, хорижда қимматбаҳо буюмлар сақлаш ва кўчмас мулкка эгалик қилиш ҳуқуқи билан боғлиқ масалалар қўшимча равишда ўрганилиши қайд этилди.
Изоҳ (0)