O‘zbekiston tashqi ishlar vaziri o‘rinbosari Sherzod Asadov Turkiya elchisi Mehmet Sureyya Er bilan 9-iyun kuni videokonferensaloqa shaklida muzokaralar o‘tkazdi.
TIV matbuot xizmatining xabar berishicha, suhbat chog‘ida siyosiy, savdo-iqtisodiy, investitsion va boshqa sohalardagi ko‘p qirrali ikki tomonlama hamkorlikning dolzarb masalalari muhokama qilindi.
Turkiya tomoni COVID-19 tarqalishi va Sardoba suv omboridagi favqulodda vaziyatning salbiy oqibatlari bilan kurashda O‘zbekistonga ko‘rsatayotgan amaliy yordami uchun minnatdorchilik bildirdi.
Toshkentda bo‘lib o‘tadigan oliy darajadagi O‘zbekiston-Turkiya strategik hamkorlik kengashining ikkinchi majlisiga tayyorgarlik masalalariga alohida e’tibor qaratildi. Xususan, tadbir kun tartibini tezkor ravishda kelishish va Strategik rejalashtirish guruhi va vazirliklararo siyosiy maslahatlashuvlar shaklidagi muzokaralarning navbatdagi raundlarini o‘tkazish zarurligi qayd etildi.
Shuningdek, joriy yilga rejalashtirilgan boshqa qo‘shma tadbirlarning jadvali va kun tartibi yuzasidan fikr almashildi.
Eslatib o‘tamiz, O‘zbekiston—Turkiya strategik hamkorlik kengashining birinchi yig‘ilishi 2020-yil 19-fevral kuni Anqarada bo‘lib o‘tgandi. Unda kengashning birinchi yig‘ilishi natijalari to‘g‘risida qo‘shma bayonot, shuningdek, iqtisodiyot, savdo, texnologiyalar sohasiga oid hujjatlar imzolangandi. Shavkat Mirziyoyev Strategik hamkorlik kengashining navbatdagi yig‘ilishini o‘tkazish uchun Rajab Toyyib Erdo‘g‘onni O‘zbekistonga taklif qilgan.
Izoh (0)